Kiơ̆ kơ noh, kơsô̆ jên tơmơ̆t lơ̆m jên mong teh đak lơ̆m dêh char Đăk Lăk sơnăm âu đei 7.770 ti hlj, hơtŏ hăm 76,93% tơdrong tơlĕch jang đơ̆ng Hô̆i đŏng kon pơlei dêh char pơjao. Atŭm hăm tơdrong răm đơ̆ng pơrang jĭ Covid-19, tơpôl lơ̆m apŭng plenh teh ơrĕk truh mŭk drăm, tơdrong jang iŏk jên mong kơ Đăk Lăk oei tơrĕk kơlih lơ anih jang mŭk drăm tơ̆ dêh char ƀơm lơ tơnap tap lơ̆m jang tĕch pơdro, đei hloi dôm anih jang mŭk drăm đei tơgop tih tên lơ̆m jên mong.

Atŭm hăm noh, tơdrong pơm kiơ̆ tơchơ̆t tơgŭm ăn anih jang mŭk drăm păng kon pơlei ƀơm răm đơ̆ng pơrang jĭ Covid-19 nhen: ưh iŏk, tơjur, pơdui khei năr ăn thuê̆ adoi hlôi pơm ăn tơdrong iŏk jên mong kơ dêh char ưh đei lơ. Tơrĕk hloh noh, tơdrong pơyua tih tên hloh kơ dêh char noh jên yua teh, kơyuơ teh hnam oei tơjur kơjă hloh kơ tơdrong tơchơ̆t.