Lơ̆m 6 khei blŭng sơnăm, tơdrong mŭk drăm - tơpôl kơ dêh char Dak Lak hơnơ̆ng pơvei păng hơtŏk tơiung. Vă đĭ đăng dôm tơdrong hơgăt đei kơsô̆ tŏk ‘lơ̆ng, hơvơn jên tơmơ̆t jang lơ̆m tơpôl, akŏp jên tĕch tơmam tơ̆ teh đak, akŏp jên thu iŏk đơ̆ng tơmang lăng tŏk pơting hăm khei ‘nâu sơnăm hơdrol. Akŏp thu mong jên jang teh đak đei hloh 60,8% jô̆ hơdrol đơ̆ng Trung ương păng hloh 50% jô̆ hơdrol đơ̆ng Jơnŭm pơgơ̆r kon pơlei dêh char pơjao, tŏk 8,8% pơting hăm khei ‘nâu sơnăm hơdrol.

Kiơ̆ kơ dôm bơngai tang măt, hăm tơdrong hơgăt jang tŏk mŭk drăm kơ dêh Dak Lak đơ̆ng 6 - 6,8% lơ̆m sơnăm 2024, hơnăp jang uơ oei dơ̆ng lơ̆m 6 khei hơtuch sơnăm ‘noh jĭ tôch kơ trăp trĭn. Vă iŏk đei jang tŏk âu ‘noh 3 tơdrong jang tơm mŭk drăm ‘noh choh jang sa, bri ‘long, ka hơdang; kơmăy kơmŏk ming man; mơdro sa, pơvih pơvăn athei hơtŏk tơiung ƀlep trong păng iŏk jang tơmam đei yua ‘lơ̆ng lăp hăm tơdrong yan âu kơ tơring.