Oh Bùi Trần Diễm Quỳnh tŏk bŏk oei hŏk lăm 9A1, hnam trưng THCS Trần Quang Diệu, xah Hòa Thuận, pơlei tơm Buôn Ma Thuột. Oh tơroi, jăl trong đơ̆ng hnam năm truh hnam trưng ataih hloh 2 km, rok kiơ̆ jăl trong Hồ Chí Minh (Jăl trong  14). Vơ̆r gre măi điê̆n năm hŏk, oh hơnơ̆ng vei sơđơ̆ng trong nơnăm: “Đơ̆ng hnam oh năm truh hnam trưng noh athei yak kiơ̆ trong tih. Oh năm hŏk hăm gre măi điê̆n lơ̆m jê̆ 4 sơnăm kơ âu bơih, ah yak kiơ̆ trong noh pơm kiơ̆ ƀlep Luơ̆t trong nơnăm, tu môk bao hiêm, yak trŏ trong pơkăp, ưh đei kơdâu renh, kơdâu kư̆ kă ôh... Năm truh hnam trưng noh chă hơlen, vei sơđơ̆ng tơ̆ anih 'măn gre, 'măn mă bot kiơ̆ trong yak păng ah brŏk inh adoi pơm thoi ăi mơ̆n”

Trưng THCS Trần Quang Diệu, xah Hòa Thuận, pơlei tơm Buôn Ma Thuột, oei ah jăl trong Hồ Chí Minh (Jăl trong 14), ataih đơ̆ng kơchơ Đạt Lý tam mă truh 200 mét. Ƀar pah trong tơ̆ tơring âu đei lơ anih tĕch tơmam et xa, noh lơ sơnăm kơ âu ah rim jơ tơm vih vơ̆t noh ah 'măng jang hnam trưng hơnơ̆ng kơ ƀơm gre tơhlăk tăk, pơm tơsŭl tơsăl trong nơnăm. Thâi pơtho Nguyễn Văn Dũng – Kơdră hnam trưng ăn tơbăt, hnam trưng hlôi tơlĕch lơ trong jang vă vei sơđơ̆ng trong nơnăm ăn 1.400 hŏk tro, mă hăt noh ah 'măng jang hnam trưng: “Tôm jơ chao kơ blŭng giĕng, trưng hlôi tơplih akŏm hŏk lĭ thuyêt ah 'măng chao kơ hăm tông tơ̆ chơnang vă tơroi truh đe oh băt hơdah păng pơm kiơ̆ Luơ̆t pơkăp trong nơnăm. 'Nguaih kơ noh, hnam trưng adoi asong khul kơ đỏ jang atŭm hăm duc pơtho jang pơgơ̆r asong vei trong ăn hŏk tro yak tơ̆ 'măng jang trưng păng pơtho hŏk tro găn trong mă sơđơ̆ng. Atŭm hăm noh, trưng adoi đei 'măng jang gah rŏng păng ah jơ lơ bơngai hloh noh pơih ăn hŏk tro lĕch vih gah rŏng ƀơ̆t hŏk đang”

Trung tă Nguyễn Trọng Nghĩa – phŏ Kơdră Anih Kanh sat hơlen trong nơnăm Kŏng an dêh char Đăk Lăk tơroi, vă vei sơđơ̆ng trong nơnăm tơ̆ dôm 'măng jang hnam trưng rok kiơ̆ jăl trong tih kơ dêh char, khei năr âu ki, anih jang hơnơ̆ng asong khul jang hơlen tơ̆ lơ 'măng jang hnam trưng vă asong trong nơnăm ah jơ vih vơ̆t tơm; atŭm hăm noh khŏm mă hơlen tơlang mă tơnăp đe hŏk tro pơm glăi tơchơ̆t vei sơđơ̆ng trong nơnăm nhen vơ̆r gre honđa kơpal 50 phân khô̆i mă kơdih po tam mă tôm sơnăm pơkăp, ưh đei tu môk ƀao hiêm, ưh đei hla bar asong vơ̆r gre, chơ hloh kơsô̆ bơngai pơkăp; sek tơlang mă trŏ hăm mĕ ƀă hŏk tro pơjao gre ăn bơngai tam mă tôm sơnăm; jang atŭm hăm hnam trưng hŏk pơjing 'măng jang hnam trưng sơđơ̆ng trong nơnăm... Trung tă Nguyễn Trọng Nghĩa tơroi: “Vă vei sơđơ̆ng trong nơnăm tơ̆ dôm ‘măng jang hnam trưng hŏk, Anih jang Kanh sat hơlen trong nơnăm Kŏng ang dêh char Đăk Lăk hlôi jang hadoi hăm dôm hnam trưng tơ̆ dôm jăl trong 14, 26 păng 27 atŭm hăm kŏng ang dôm xah, tơroi tơbăt truh hŏk tro, mĕ ƀă hŏk tro, bơngai pơtho pơm kiơ̆ trŏ ƀlep Luơ̆t vei sơđơ̆ng trong nơnăm; tơlĕch asong hla bar tơroi, panô ap phĭt ah ‘măng jang hnam trưng hŏk sơđơ̆ng ‘lơ̆ng. Nhôn hơnơ̆ng sơkơ̆t sơnong jang âu athei hơnơ̆ng, kơjăp hloh”

Dêh char Đăk Lăk dang ei đei jê̆ 490.000 hŏk tro đơ̆ng jăl mâm non truh  THPT, kiơ̆ hŏk tơ̆ 1.006 hnam trưng. Mă lơ noh trưng hŏk adoi oei tơjê̆ Jăl trong tơm 14 (trong Hồ Chí Minh), Jăl trong 26, Jăl trong 27 păng dôm jăl trong tơm lơ̆m dêh char, atŭm hăm lơ jăl trong tơ̆ dôm apŭng, thĭ xah păng pơlei tơm Buôn Ma Thuột, tơring đei lơ gre vih vơ̆t noh pơngơ̆t kơ tơsŭl tơsăl trong nơnăm. Ƀok Phạm Đăng Khoa – Kơdră Anih jang Pơtho Pơhrăm dêh char Đăk Lăk ăn tơbăt, khei năr âu ki mă anih jang kơpal, rim hnam trưng hŏk hlôi jang tơnăp tơdrong tơroi pơtho Luơ̆t vei sơđơ̆ng trong nơnăm truh đe hŏk tro păng mĕ ƀă hŏk tro, mă lei tơdrong hơdral pơm kiơ̆ đơ̆ng minh ƀar hŏk tro păng mĕ ƀă hŏk tro adoi oei tơjruh. Tơdrong tơsŭl tơsăl trong nơnăm tơ̆ dôm ‘măng jang hnam trưng hŏk oei đei, mă kăl noh ah jơ hŏk đang. Vă hơmet pơ-‘lơ̆ng tơdrong mă âu, Anih jang Pơtho Pơhrăm hlôi jang hăm anih jang kơpal tơroi tơƀôh ăn mĕ ƀă hŏk tro, păng kon pơlei lơ̆m tơring hơtŏk hloh dơ̆ng tơdrong pơm kiơ̆ Luơ̆t vei sơđơ̆ng trong nơnăm; ah ‘nhăk păng sơng kon hơ-ioh noh athei pơm kiơ̆ tơdrong tơroi đơ̆ng khul jang kơpal, bơngai jang vei sơđơ̆ng trong nơnăm; pơih să tơdrong jang vei sơđơ̆ng trong nơnăm: “Vă vei sơđơ̆ng trong nơnăm hăm đe hŏk tro, mĕ ƀă hŏk tro păng rim bơngai pơtho, Anih jang Pơtho Pơhrăm hlôi pơtruh lơ hla bar pơkăl rim hnam trưng dah đei trong jang hơbĕch hơbal vă vei sơđơ̆ng trong nơnăm, mă kăl ah jơ tơm sơng ‘nhăk đe mon tơ̆ hnam trưng. Rim hnam trưng hŏk tơ̆ dôm apŭng, thĭ xah, pơlei tơm adoi jang kơjăp hăm khul jang vei lăng trong nơnăm vă chă tơroi tơbăt gah Luơ̆t vei sơđơ̆ng trong nơnăm vă đe oh băt hơdah ah chă vih vơ̆t kiơ̆ trong nơnăm gơh sơđơ̆ng hloh”

Hăm tơdrong vang jang kăp gĭt đơ̆ng dôm jăl jang, tơdrong tơnăp lơ̆m vih vơ̆t kiơ̆ trong nơnăm đơ̆ng mĕ ƀă hŏk tro păng đe hŏk tro đei hơtŏk, tơdrong tơhlăk tơhlĭn tơsŭl tơsăl trong nơnăm ah ‘măng jang hnam trưng hŏk tơ̆ Đăk Lăk lơ̆m jơ hŏk đang brư̆ brư̆ đei hơmet pơ-‘lơ̆ng, tơgop pơjing hnam trưng jơk sơđơ̆ng, rơgoh păng sơđơ̆ng trong nơnăm.