Hrei ‘nâu, tơdrong răt tơmam đang kơ ‘nŏh iŏk kơmăy điên thoăi rơgei (smartphone) quét mã QR kla jên dăh mă chuyển khoản đĭ tôch juăt tơ̆ dôm anih tĕch mơdro, kơ chơ lơ̆m plt Buôn Ma Thuột. Yă Đinh Thị Thanh 60 sơnăm, tơ̆ phường Tự An tơroi, dôm sơnăm adrol ki mưh năm kơchơ dăh mă siêu thị răt tơmam hơnơ̆ng chĕp ba jên măt vă kla. Mă lei dang 2 sơnăm vih tơ̆ âu, tơdrong kla jên răt tơmam hăm yă nhen ưh pă đei yoa jên măt bơih, tơplih kơ 'noh jĭ yoa điên thoăi quét mã QR mă ưh 'nŏh chuyên khoan.

Yă Thanh akhan, tơdrong kla jên nhen hrei 'nâu tôch hiôk: “Inh iŏk jên hưu đơ̆ng sơ̆ truh dang ei kiơ̆ tài khoản ngăl, adrol sơ̆ vă năm kơchơ dăh mă siêu thị ‘nŏh athei kon sâu năm tŏh jên tơ̆ ATM. Mă lei dang ei răt yă kiơ tơ̆ kơchơ dăh mă siêu thị kŭm kla jên kiơ̆ trong mã quét QR ngăl, ưh pă kăl kla jên măt bơih. Inh năm tơ̆ kơchơ Phan Chu Trinh, Tân An, dăh mă kơchơ tơm Buôn Ma Thuột, vă rim bơngai pơdro đơ̆ng tĕch ‘nhot, ‘nhĕm, ka, pơkao, hơbăn ao đei… mã QR in pơklĕm dăh mă pơih lăng lơ̆m điên thoăi đe sư ngăl vă kla jên. Inh ƀôh tôch hiôk, ưh kơ hli đe hơlĕnh, kla ưh tôm dăh mă hơvơ̆l.”

Yă Nguyễn Thị Liên, đơ̆ng rŏng vă jê̆ 20 sơnăm tĕch pơkao, plei ‘long tơ̆ kơchơ Tân An, plt Buôn Ma Thuột ăn tơbăt, yă hlôi hŏk đei trong kla jên ưh kăl jên măt đơ̆ng dôm bơngai pơdro jum dăr. Tơdrong kla jên kơsô̆, sek tơlang đei lơ tơdrong ăn bơngai pơdro păng bơngai răt tơmam: “Pơma atŭm bơngai răt đe kla jên măt athei pơdreu tơplih âu to tôch hiơ̆. Đei bơngai răt tơmam lăp 20.000 dăh mă 30.000 hlak mă lei đe ăn jên 500.000 ba ưh đei jên răih vă tơplih athei chă đôih tơ̆ đe, tôch pơmat. Tơdrong quét QR kla jên âu ƀônh dêh. Inh hơpơi ‘mĕh kla jên kiơ̆ QR âu đei hăm rim kon pơlei yoa sư tôch ƀônh hiôk. Yoa adrol ki kŭm tơplih jên hơvơ̆l ăn lơ bơngai, oei quét QR ‘nŏh ưh kơ đei hơvơ̆l kiơ, ƀônh hlŏh kơ kla jên măt.”

Kiơ̆ Anih mong jên teh đak Việt Nam tơ̆ Đắk Lắk, đơ̆ng rŏng vă jê̆ 2 sơnăm tơlĕch “Tơdrong tưk tơiung trong kla jên ưh kăl hăm jên măt tơ̆ Việt Nam đơ̆ng 2021-2025”, truh dang ei, dôm anih mong jên tơ̆ Đắk Lắk hlôi pơih đei hlŏh 2.600.000 tài khoản ăn tơmoi. Tơdrong bơngai yoa tài khoản kiơ̆ điên thoăi rơgei jô̆păh lăp tŏk đơ̆ng 50 – 80% 1 sơnăm; kơsô̆ bơngai, khul grŭp yoa kơmăy kla jên kiơ̆ dôm kênh điên tư đei 40%. Dôm tơdrong jang pơgang, pơtho pơhrăm đĭ đei dang 1 puăt bơngai, khul grŭp kla jên hăm điên tư, kla jên pơgang, jên hŏk ưh pă đei kăl kla hăm jên măt bơih.  

Yă Phùng Thị Thơm – Phŏ Lăm jang kơmăt roi tơbăt, Anih vei lăng tơdrong tơroi tơbăt dêh char Đắk Lắk akhan, lơ̆m dêh char pơjing đei 1.426 grŭp kơmăy sô̆ tơpôl, hăm 9.278 ‘nu bơngai jang. Dôm grŭp âu vang tơgŭm tơplih hăm kơmăy sô̆; kai iŏk hơnăn điên tư VNeID; pơtho ăn unh hnam tĕch mơdro, kon pơlei tơ̆ tơring chih măt, iŏk yoa trong kla jên ưh kăl jên măt; pơtho pơm tài khoản păng nôp hla ar pơvih kiơ̆ kơmăy trư̆k tuyê̆n…

Yă Thơm tơroi: “Anih vei lăng kon pơlei dêh char đĭ pơjing dôm grŭp jang kơmăy sô̆ lơ̆m tơpôl đơ̆ng dêh char jur truh tơ̆ apŭng, xăh păng dôm pơlei pơla dăh mă kueng kơphô̆. Sơnăm 2024, Anih nhôn tơlĕch trong păng pơtho tơƀôh ăn dôm xăh, phường tơ̆ dôm grŭp jang kơmăy sô̆ tơpôl âu vă hơtŏk hlŏh dơ̆ng tơdrong đei yoa mưh pơtho ăn kon pơlei kla jên ưh kăl kla hăm jên măt.”./.