Pơgơ̆r đơ̆ng dang ei truh đĭ ‘năr 16/1, Pơdă ‘noh đei 3 tơdrong jang tơm, ‘noh jĭ pơdă 97 rup găh dôm tơdrong jang pơhrăm khŏm iung tơblăh păng tơdrong arih sa đơ̆ng kang ƀô̆, khŭl lĭnh păng kon pơlei lơ̆m achon đak dơsĭ Trường Sa; Pơdăh 5 tập phim tơroi - hla ar kăl găh Trường Sa; Pơdă um rup 21 hơbon kông găh achon Trường Sa kơ Việt Nam păng dôm tơmam nhen hla kơ Teh đak, hla kơ Lĭnh đak dơsĭ kon pơlei Việt Nam, Mê đai Khŭl lĭnh Trường Sa, tơmam pơm đơ̆ng kơđoh bơ̆n hơbâu yua đơ̆ng dôm khŭl lĭnh lơ̆m achon đak dơsĭ Trường Sa chă pơm kơdih hăm ti.

Lăp đơ̆ng rŏng kơ lêh pơgơ̆r pơih blŭng, tôch kơ lơ kon pơlei păng tơmoi truh lăng pơdă tơƀôh. Lơ bơngai tơƀôh jơhngơ̆m đon, dôm phim, hla ar, rup hlôi roi tơbăt lơ, tơ jê̆, tơpă găh achon đak dơsĭ Trường Sa lơ trong păng ƀĕnh tơdrong hơrih.