Tơdrong jŏh hơri vă hơiă kơ ‘măng tơbăt Năr pơjing Khul druh dăm xung phong (15/7), tơƀôh jơhngâm đon ‘mêm bơnê năr linh jĭ rơka, linh lôch tang ăn tĕh đak (27/7). Tơ̆ âu, dôm bơngai tang măt chă pơđou dơ̆ng tơdrong hơiă lơ̆m 73 sơnăm đơ̆ng khul druh dăm xung phong, lăng, mơ̆ng ngôi ƀai hơri pôk pơ ư jơhngâm đon adrin iung tơblăh tôch kơtang, đon tơchĕng ‘lơ̆ng, lui hăm tơdrong tơblăh jơnei păng dôm tơdrong ‘lơ̆ng hơiă, băt ‘mêm băl đơ̆ng bôl boăl.

Bơngai dơ̆ng tang ăn đe druh dăm xung phong sơ̆ kơ dêh char Dak Lak oei pơma nuh găh tơdrong ‘lơ̆ng hơiă hơnơ̆ng kơ ƀlŏk truh lơ̆m khei ‘năr vang iung tơblăh, jơhngâm ‘mêm băt băl, mât mĭnh ƀơ̆r đon đơ̆ng linh hăm kon pơlei, adrin jang đang ‘lơ̆ng rim tơdrong jang păng dôm tơdrong hiong răm, chu lôch tang hơkâu kơdih. Ƀlep ƀât ‘măng mă âu, anih pơgơ̆r hơpăh 15 blăh hla ar mong jên (1 blăh hla ar mong jên đei kơjă 5 triu) păng 32 tơpu tơmam ăn đe druh dăm xung phong so sơ̆ đei tơdrong arih xa pơmat tat.