Lơ̆m 2 năr thi, 19 khul, 183 ‘nu bơngai thi găh 3 tơdrong: Nơ̆r kơ kŭh, sek tơlang dôm tơdrong đei ƀôh păng pơm tông găh Krao hơvơn kon pơlei. Tơdrong thi ƀơm truh đon hlôh vao găh đon tơchĕng, trong jang đơ̆ng Đảng, tơdrong tơgŭm, khôi luơ̆t đơ̆ng tĕh đak păng đon tơchĕng Hồ Chí Minh găh tơdrong krao hơvơn kon pơlei.

Dôm tơdrong krao hơvơn kon pơlei đei ƀôh tơ̆ yăn âu hlôi đei hơmet ming, sek tơlang tơ̆ tơring, anih jang, khul grŭp. Akŏm lơ̆m dôm tơdrong tơgar băl tĕh, hil hởĕh băl lơ̆m kon pơlei; tơdrong tơgŭm ăn kon kông, tơdrong lui khop; tơdrong pơgơ̆r sek tơlang, hrŭ ‘mong jên mưh iŏk pơdreu tĕh.

Kiơ̆ anih pơgơ̆r, tơdrong thi “Krao hơvơn kon pơlei rơgei” sơnăm ‘nâu tơ̆ dôm anih jang kơ tĕh đak lơ̆m dêh char ‘nŏh jĭ tơdrong jang chinh trĭ tôch đei yoa lơ̆m tơdrong krao hơvơn kon pơlei. Kiơ̆ đơ̆ng noh vă hơtŏk đon hlôh vao, đon jang tơnăp ăn kăn ƀô̆ đảng viên, bơngai jang ăn tĕh đak tơ̆ rim anih jang găh trong jang đơ̆ng Đảng, khôi luơ̆t tĕh đak ƀơm truh tơdrong krao hơvơn kon pơlei.