Hlôi đei vă jê̆ 500 tơdrong jang hơdruh tơdăm đei bơ̆jang hăm akŏp kơjă vă jê̆ 7,8 ti hlak jên. ‘Nâu jĭ dôm jơnei ‘lơ̆ng đei tơroi tơ̆ hop akŏm pơtôch tơdrong jang Hơdruh tơdăm năm jang tơgŭm pơyan he sơnăm 2023 đơ̆ng Anih jang Đoàn dêh char Dak Lak pơgơ̆r hơtuch giĕng âu ki. Hăm hơnăn Sơnăm mơ lôh Dak Lak iung jang hơdrol lơ̆m tơplih kơ sô̆, Tơdrong jang hơdruh tơdăm năm iung jang tơgŭm pơyan he dêh char Dak Lak sơnăm ‘nâu đei tơlĕch jang hăm hloh 830 khŭl năm jang tơgŭm, 270.400 ‘nu đoàn viên, hơdruh tơdăm vang jang.

Lơ̆m 3 khei bơ̆jang, lơ̆m dêh char hlôi bơ̆jang vă jê̆ 500 tơdrong jang hơdruh tơdăm hăm akŏp kơjă pơm đei yua ‘noh vă jê̆ 7,8 ti hlak jên. Dôm tơdrong jang akŏm lơ̆m bơ̆jang nhen: vang jang pơjing tơring tơrang ‘nao, anih kơdrơ̆m hơgei; vei lăng cham char, tơ jră hăm tơplih tŏ ‘mi kial; vei sơđơ̆ng tơpôl păng vei lăng ăn hơioh. Lơ tơdrong jang akŏm lơ̆m dôm tơring hơtăih hơtŏ, tơring sơlam tơ̆ dôm apŭng Lắk, Mdrăk, Buôn Đôn, Ea Sup păng Krông Bông.