Lơ̆m sơnăm 2023, Kŏng ty hnam kmăi ŭnh hơyuh Đak Lăk hlôi hơmet pơ ‘lơ̆ng chô̆ hơmet hlŏh 30km tơlei kap kap viễn thông tơ̆ apŭng Krông Pach, Buôn Đôn, Cư Kuin, Krông Ana, Ea Súp, Krông Bông, Lăk păng Cư M'gar. Hơnơ̆ng hơmet pơ ‘lơ̆ng tơlei kap viễn thông, mă kăl hơmet pơ ‘lơ̆ng dôm hơnih ưh sơđơ̆ng, hơmơ̆t pơm đei tơdrong găh ŭnh hơyuh, Hnam kmăi ŭnh hơyuh Đak Lăk hlôi pơjing khul Zalo “Hạ tầng kỹ thuật” hăm hloh 50 ‘nu bơngai ‘nŏh đei kơdră chĕp pơgơ̆r hơnih jang ŭnh hơyuh, kơdră chĕp pơgơ̆r 6 hơnih jang viễn thông, bơngai jang vei lăng trong tơlei, kŏng nhân vei lăng tơlei kap.

Rim năr, khul sơng iŏk kơtơ̆ng ang, rup phin tơbăt hơdăh hơnih mưh đei tơdrong dăng tơlei kap tơ̆ jrăng ŭnh hơyuh, drơ̆ng mĭnh nơ̆r jơ ‘năr hơmet ming hăm tơdrong sơkơ̆t hơdăh tơlei kap găh hơnih ayơ đơ̆ng rŏng ‘nŏh gô iŏk tơvih, kăt pơ-‘lơ̆ng, chô̆ pơ-‘lơ̆ng. Mă đơ̆ng ‘nao pơjing mă lei Khul Zalo “Hạ tầng kỹ thuật” hlôi tơgŭm hơmet pơ ‘lơ̆ng tĕnh koăng, veh ver tơdrong kăt ƀơm tơlei kap oei gơ̆h iŏk yua pơm kơnê̆ truh tơdrong pơtruh internet. Lơ̆m khei năr kơnh, PC Đăk Lăk hơnơ̆ng vei kơjăp khul Zalo păng pơ̆ih să hloh dơ̆ng khul găh Hơnih vei lăng tơdrong jang Kơtơ̆ng ang păng Pơre nơ̆r, Hơnih jang muk drăm rim apŭng, pơlei tơm, thĭ xah, Kŏng ty vei lăng ‘long pơtăm, ŭnh hơyuh…, vă hơmet pơ ‘lơ̆ng dôm tơdrong đei hơvơn hloh dơ̆ng. Tơdrong mă au vă atŏk kơtang jang hơdoi ƀar păh rim hơnih jang, sơđơ̆ng ‘lơ̆ng ‘liĕm ăn tơring kơdrơ̆m, hơmet pơ ‘lơ̆ng tơlei kap viễn thông, kăt chre hơdrai ‘long ... mă lei hoei pơm kơnê̆ truh tơdrong pơtruh ŭnh hơyuh, tơlei internet kơ rim hơnih jang.