Puăn ‘nu ƀok thây kô kơ dêh char Dak Lăk hlôi sơng iŏk đei hơnăn Nhà giáo ưu tú ‘noh đei: Ƀok Phạm Đăng Khoa, Kơdră chĕp pơgơ̆r Khul pơtrŭt hŏk pơhrăm, sơ̆ jang Kơdră chĕp pơgơ̆r Hơnih vei lăng hnam trương pơtho pơhrăm dêh char; ƀok Đỗ Tường Hiệp, Kơ iĕng Kơdră chĕp pơgơ̆r; yă Thái Thị Mỹ Bình, Chánh Văn phòng Hơnih vei lăng Hnam trương pơtho pơhrăm dêh char Dak Lăk păng ƀok Quách Đình Bảo, Kơdră chĕp pơgơ̆r Hnam trương jăl kơđeh Ea Hleo. Iung pơma hmach bơnê, Kơdră chĕp pơgơ̆r Hơnih vei lăng kon pơlei dêh char Dak Lăk hôn bơnê kơ tang dôm tơdrong jơnei, tơdrong tơgop đơ̆ng rim ƀok thây kô pơtho ăn tơdrong jang pơtho pơhrăm kơ dêh char lơ̆m khei năr ou ki. Adoi hơpơi ‘meh vă, hăm tơdrong kơrŭn đĭ ai, tơgoăt tơgoăl, drơ̆ng mĭnh ƀar đon, lơ̆m khul kơdră chĕp pơgơ̆r, pơrô̆ jang đơ̆ng kang ƀô̆ vei lăng, hăm tơdrong tơnăp đơ̆ng tơpôl ƀok thây kô pơtho, bơngai jang lơ̆m hơnih jang pơtho pơhrăm, hăm tơdrong hưch hanh lơm hŏk pơhrăm kơ rim đe hŏk tro, hơnih vei lăng hnam trương pơtho pơhrăm dêh char Dak Lăk gô yak hloh tơdrong tơnap tap iung jang keh đang ‘lơ̆ng tơdrong jang pơjao ăn.