Đơ̆ng rŏng 50 sơnăm tơblăh iŏk rơngei, đơ̆ng 1 dêh char groi kông tơnuh hin, pơmat tat, ưh băt trong choh jang xa, Đắk Lắk đĭ tŏk jing 1 tơring pơdrŏng đei ƀôh, jĭ anih tơm jang mŭk drăm, chinh trĭ kơ tơring Tây Nguyên. Mŭk drăm dêh char hơnơ̆ng tŏk sơđơ̆ng ‘lơ̆ng, jô̆ păh lăp lơ̆m 10 sơnăm tơjê̆ âu đei 6,15% 1 sơnăm. Tơdrong jang mŭk drăm roi đunh roi tih xă păng tŏk pran, truh sơnăm 2024 dơ̆ng hơdrol tơ̆ tơring Tây Nguyên, dơ̆ng mă mônh tơ̆ tơring Tơter đak dơsĭ kơ tơring Tŏk bok păng Tây Nguyên.

 Pơma tơ̆ lêh tơbăt 50 sơnăm tơblăh jơnei Buôn Ma Thuột, Phó Thủ tướng Trần Hồng Hà athei dêh char hơnơ̆ng jang ‘lơ̆ng hơnăp jang đơ̆ng dêh char tŏk bŏk Tây Nguyên lơ̆m rim tơdrong. Lơ̆m noh, pơjing plt Buôn Ma Thuột jing tơring kơdrâm tơm dơnơm, jĭ ‘măng mât lĕch kơ tơring Tây Nguyên, mât hơdai hăm mŭk drăm apŭng plenh teh, jĭ plt rơgŏh ‘lơ̆ng – đei lơ bri ‘long – gơ̆h hơgei – chĕp vei rim tơdrong juăt ‘lơ̆ng, jĭ 1 tơring kơdrâm đei hloi tơdrong juăt ‘lơ̆ng đơ̆ng joh ayŏ kơ dŏ xoang păng bri brăh. Phó Thủ tướng hơpơi ‘mĕh păng lui Đảng ƀô̆, khul kơdră pơgơ̆r, khul linh păng kon pơlei dôm hơdrĕch hơdrung lơ̆m dêh char tưk tơiung jơhngâm đon tơblăh jơnei Buôn Ma Thuột ưh kĕ tôch, yak mât lơ̆m chăl ‘nao, chăl jang tŏk hơnŭk hơnoa, phĭ tơtŏ dơnŏ ‘lơ̆ng păng hiôk chơt.