Kơsơ̆ brei 9-1, Anih chĕp kơ̆l Đảng dêh char Đắk Lắk pơgơ̆r Hop akŏm pơtôch 5 sơnăm bơ̆ jang Tơdrong tơchơ̆t kơsô̆ 35/2018 đơ̆ng Anih tơm Chinh trĭ jăl XII găh “Hơtŏk tơdrong vei lăng đon tơchĕng đơ̆ng Đảng, tơjră plơ̆ dôm đon tơchĕng ưh kơ trŏ, ‘mĕh pơm hơyăt lơ̆m chăl ‘nao”, Pơtôch tơdrong jang Tuyên giáo sơnăm 2023, tơlĕch tơdrong jang sơnăm 2024. Lơ̆m dôm sơnăm âu ki, tơdrong tơjră, tang găn đon pơvĕr, hơlĕnh pơdăr “chă trong phă ngơ̆r tơdrong rơngei” păng dôm tơdrong tơjră phă ngơ̆r teh đak nai đơ̆ng khul hơyăt păng khul iung tơjră tơ̆ Đắk Lắk iŏk đei lơ tơdrong ‘lơ̆ng.

Rim Đảng ƀô̆ adrin tơplih ‘nao, hơtŏk tơdrong ‘lơ̆ng rơgei, đei yoa đơ̆ng tơdrong jang roi tơƀôh găh đon tơchĕng, jŏh ayŏ kơ dŏ xoang. Mă lei, tơ̆ Đắk Lắk oei đei lơ tơdrong krê găh tơdrong sơđơ̆ng, mă loi jĭ dôm tơdrong đei ƀơm truh tơ̆ teh, hơdrĕch hơdrung, tơdrong lui khop. Dôm khul hơyăt chă pơvĕr tơgĕch iŏk tơdrong chinh trĭ pơ chŭt, dui hor, pơjing Khul tơjră plơ̆ Đảng, teh đak, chăl chĕp kơ̆l pơgơ̆r.

Pơma tơ̆ hop akŏm, ƀok Phạm Minh Tấn, Phó Bí thư chĕp kơ̆l Đảng dêh char Đắk Lắk athei, tơ̆ hơnăp kơnh, rim anih jang đảng, khul kơdră tơring hơnơ̆ng hơtŏk tơdrong jang tơjră plơ̆, tang găn pơđĭ dôm đon chĕng ưh kơ trŏ, ‘mĕh pơm hơyăt, vei lăng kơjăp đon tơchĕng đơ̆ng Đảng, năng ‘nâu jĭ tơdrong jang gĭt kăl athei bơ̆ jang hơnơ̆ng tơ̆ rim anih jang chinh trĭ păng rim kăn ƀô̆, đảng viên. Atŭm hăm ‘nŏh, hơnơ̆ng băt hơdăh, tơchĕng hơlen, lăng năng nơ̆r pơma lơ̆m tơpôl vă tơtom roi tơƀôh, sek tơlang hrôih dôm tơdrong tơtŏ đei đơ̆ng tơring tơrang.