'Nâu jing 'măng hop akŏm kiơ̆ tơchơ̆t ah tong anê̆ sơnăm vă hơlen xơkơ̆t hơdăh tơdrong pơm kiơ̆ tơchơ̆t mă Jơnŭm jang vei lăng kon pơlei dêh char tơlĕch găh hơtŏk mŭk drăm – tơpôl 6 khei blŭng sơnăm păng tơlĕch sơnong jang ăn 6 khei hơtuch sơnăm.

Tơroi ah hop akŏm, lơ̆m 6 khei blŭng sơnăm âu, mŭk drăm tơpôl dêh char Đak Lăk đei ƀôh sơđơ̆ng. Kơjă tơmam drăm đei lơ̆m dêh char đei yua jê̆ 24.500 ti hlj, tŏk 4% pơtêng hăm khei năr âu sơnăm 2022. Tơmam tĕch ăn teh đak đe đei yua 810 trĭu đôlar, tŏk 2% pơtêng hăm khei năr âu sơnăm sơ̆. Mă lei, tơmơ̆t jên mong kơ teh đak tơjur 16,6% pơtêng hăm khei năr âu, dôm tơdrong hơvơn asong jang, hơmet jang tĕch pơdro, sek asong tơdrong jang, tơjur hin dơnuh kơjăp sơđơ̆ng ƀơm lơ tơnap tap, dôm tơchơ̆t jang kơ teh đak pơm jang adar... 'Măng hop akŏm mă âu, atŭm hăm pơma đam, tơlĕch dôm trong jang hơtŏk mŭk drăm – tơpôl 6 khei hơtuch sơnăm, Jơnŭm jang vei lăng kon pơlei dêh char Đak Lăk gô pơma đam, tơgop nơ̆r ăn lơ tơdrong jang kăp gĭt kơ dêh char; tơblang dôm tơdrong tơnap tap, tơhlăk tăk athei pơklaih, pơm hơdăh tơdrong tơm pơm đei lơ̆m pơm jang ah 6 khei hơtuch sơnăm.