Tơ̆ kơchơ tơm Buôn Ma Thuột - hơnih tĕch mơdro joăt joe tih hloh kơ dêh char Dak Lăk hlôi chă pơdă lơ tơmam drăm ‘lơ̆ng liĕm, trŏ lăp hăm khei năr chă răt yua lơ̆m hơtuch sơnăm. Lơ hloh ‘noh găh hơbĕn ao, chơkhŏ, ƀĕng keo ... Mŏ Đoàn Thị Phong, tĕch hơbĕn ao tơ̆ Hơnih B, kơchơ Tơm Buôn Ma Thuột tơbăt:“Sơnăm au ĭnh răt răk tơmam drăm tĕch mơdro têt tŏk 20% pơtêng hăm rim sơnăm, ba jei chă pơprŏ tơmam drăm vă tĕch mơdro đơ̆ng rŏng Têt dương lĭch păng tĕch mơdro lơ̆m khei năr têt hloi. Hơmŏ tơdrong đe chă răt lơ, tĕch mơdro hlot lơ. Kơjă tơmam drăm sơnăm au jei păh ai, lơ kơ loăi tơmam drăm. Sơnăm au, tơmam drăm choh pơtăm pơma atŭm lơ̆m dêh char đei iŏk yua tôch hơ iă, nhôn hơmŏ ƀơ̆t têt đe chă răt lơ hloh dơ̆ng”.

Kiơ̆ đơ̆ng mŏ Lưu Thị Hồng Hạnh, tơ-‘ngla hơdrơ̆r tĕch mơdro tơmam drăm tơ̆hơnih C, kơchơ tơm Buôn Ma Thuột, dôm sơnăm tơjê̆ au, kon pơlei chă răt yua tơmam drăm têt ưh kơ rơ ông rơ ang nhen dôm sơnăm hơdrol, bơngai răt jei lăng kơjăp dôm tơmam drăm ‘lơ̆ng ngăl kơna rim bơngai tĕch mơdro jei chă rơ̆ih răt tơmơ̆t vă tĕch mơdro dôm tơmam drăm ‘lơ̆ng vă chă tĕch ăn kon pơlei:“Kơjă sơnăm au jei sơđơ̆ng, đei tơjur ƀiơ̆. Pơma atŭm dôm tơmam drăm sơnăm au đei lơ kơ loăi. Lơ̆m khei năr ba răt tơmơ̆t tơmam drăm vă tĕch mơdro ăn kon pơlei răt yua lơ̆m khei năr têt, ba hlôi đei dôm tơmam drăm pơklep tem ngăl, đei hla bơar tĕch răt dih băl, hla bơar pơkăp sơđơ̆ng tơmam drăm sa găh ƀĕng keo, đĭ đăng dôm tơmam drăm sa kơna kon pơlei bơ̆n ‘nĕ chă tơtăm yă kiơ ôh”.

Tĕch mơdro ăn lơ̆m khei năr Tết Giáp Thìn sơnăm au, rim hơnih tĕch tơm lơ̆m dêh char Dak Lăk jei hlôi hơmet pơ ‘lơ̆ng tơmam drăm, kĭ pơkăp dih băl hăm rim hơnih pơm tơlĕch tĕch mơdro ‘lơ̆ng vă sơđơ̆ng ‘lơ̆ng tơmam drăm. Rim siêu thĭ tơ̆ Dak Lăk hlôi tơlĕch lơ trong jang hơpăh păng lơ trong jang tơgŭm kơjă nhen: pơm tơjur kơjă hloi, răk điêm, pôk ăn kơphiê̆u răt tơmam drăm, hơpăh ăn, răt 2 hơpăh ăn 1…

Kiơ̆ đơ̆ng ƀok Bùi Văn Quân, Kơdră chĕp pơgơ̆r siêu thĭ Go Buôn Ma Thuột, truh khei năr au siêu thĭ hlôi jang keh đang răt răk tơmam drăm Têt, hăm dôm tơmam drăm tơm hlôi tŏk truh 32 ti hlak jên.“Siêu thĭ hơmet ăn pơprŏ têt hơdrol 2 khei, trong jang kơ nhôn sơnăm au tơjur tŏ sĕt găh ƀier hơlăk truh 50% kơ yuơ tơdrong ‘meh vă chă răt pă gan kơtang păng kơ yuơ dôm trong pơkăp đơ̆ng teh đak. Nhôn răt răk lơ tơmam drăm pơkrot, hơnih mong răk sơngiĕo păng bơ̆ jang hăm hơnih tĕch ăn vă hơmet ăn tơmam drăm têt”.

Kiơ̆ đơ̆ng ƀok Nguyễn Văn Nghiêm, Kơ iĕng Kơdră chĕp pơgơ̆r Hơnih vei lăng Mơdro sa dêh char Dak Lăk, tơdrong ‘meh vă răt yua lơ̆m khei năr  Têt Nguyên đán Giáp Thìn 2024 lơ̆m dêh char Dak Lăk rŏ năng gô tŏk 15%. Hơnih jang vei lăng mơdro sa hlôi pơrô̆ athei rim hơnih tĕch mơdro lơ̆m dêh char tơlĕch trong pơprŏ jang răt mong răk lơ tơmam drăm, tơmam drăm ‘lơ̆ng, kơjă păh ai păng athei rim hơnih mơdro sa tĕch mơdro tơmam drăm hăm kơjă sơđơ̆ng, pơkăp dih băl ưh kơ lê̆ đei tơdrong ưh kơ măh tơmam drăm, ưh pơm hơtŏk kơjă. Atŭm hăm ‘noh, tơlĕch lơ trong jang pơtrŭt răt yua, pơgơ̆r jơnŭm kơchơ, pơdă, ‘măng pơgơ̆r kơchơ tơmam drăm Việt năm tơ̆ tơring choh jang sa... Ƀok Nguyễn Văn Nghiêm, tơbăt:“Truh dang ei đei 11 hơnih mơdro sa vang iung jang tơdrong jang pơm sơđơ̆ng kơjă rim tơmam drăm kăl. Akop kơjă vă jê̆ 500 ti hlak jên, tim mă jô̆ hăm kon pơlei tĕch mơdro, ŭnh hnam đei hơnih tĕch mơdro lơ̆m dêh char. Sơnăm au, đei rơvơn hloh, ‘noh rim hơnih mơdro sa hơmet ăn lơ tơmam drăm ‘lơ̆ng liĕm păng lơ kơ loăi sơđơ̆ng ‘lơ̆ng, rơgoh tơmam drăm sa. Nhôn jei bơ̆ jang hăm hơnih mơdro sa, dôm tơring ayơ ưh kơ măh tơmam drăm tĕch mơdro ‘noh chơ ba tơmam drăm năm truh tơ̆ noh tơdăh tơring ‘noh ‘meh vă”

Hơmet ăn ‘lơ̆ng hơ iă đơ̆ng rim bơngai tĕch mơdro, hơnih mơdro sa păng hơnih bơ̆ jang vei lăng mơdro sa ‘noh jing tơdrong hơ iă hloh vă pơtrŭt tĕch răt, pơjing rơvơn ‘lơ̆ng hơ iă hloh ăn kon pơlei Dak Lăk sơng têt tôm tong, sơđơ̆ng ‘lơ̆ng hơ iă.