Tŏk bŏk oei răt minh ƀar tơmam kro ăn ‘măn Têt tơ̆ siu thĭ Coop Mart pơlei tơm Buôn Ma Thuột, pơmai Võ Thị Mỹ Hương, tơ̆ phương Tân Lợi, pơlei tơm Buôn Ma Thuột ăn tơbăt, sơnăm âu kơyuơ mŭk drăm tơnap tap noh unh hnam pơmai răt dôm tơmam drăm kăl đĕch: “Unh hnam chă răt dôm tơmam drăm kăl ‘măn yua ah Têt, kơyuơ đơ̆ng pơrang jĭ COVID pơm đei noh kon pơlei ưh gan chă răt lơ tơmam, mă hơdrô̆ răt dôm tơmam drăm kăl đĕch”

Chă yak hơlen lăng tơ̆ kơchơ Tơm Buôn Ma Thuột noh ƀôh hơdah, dôm tơmam ‘măn tĕch ah Têt hlôi đei dôm bơngai pơdro tơlĕch hăm lơ um ai ‘lơ̆ng, mă lei ưh đei lơ bơngai chă răt. Pơmai Lê Thị Thùy Như, tơ̆ anih C, kơchơ Tơm Buôn Ma Thuột tĕch tơmam drăm yua lơ̆m 15 sơnăm kơ âu ăn tơbăt, sơnăm âu bơngai răt tơmam drăm tŏ sĕt hloh: “Rơnguơ̆ hloh kơ sơnăm sơ̆, pơtih nhen sơnăm sơ̆ tĕch đei 5-7 trĭu, sơnăm âu oei pă  2-3 trĭu đĕch. Sơnăm sơ̆ tơmam âu đơ̆ng năr 20 tŏk tơ̆ kơpal noh tĕch hơnơ̆ng hloi, mă lei sơnăm khăi bơngai răt”

Lơ tơmam nhen ƀanh kĕo, mư̆k, găr pơkai adoi rơnguơ̆ rơngot mơ̆n. Kiơ̆ kơ ƀok Lương Ngọc Hoàng, tơ-‘ngla anih tĕch ƀanh kĕo tơ̆ kơchơ Tơm Buôn Ma Thuột, sơnăm âu đe răt adar hloh, lơ̆m dôm năr hơtuch giĕng noh đei lơ ƀiơ̆, sư hơdrô̆ răt tơmơ̆t tơmam drăm 60% đĕch pơtêng hăm sơnăm sơ̆, mă lei bơngai răt nhen dang ei noh adoi ưh kơ akhan kĕ tĕch đĭ tơmam ôh: “Bơngai răt ưh đei lơ, kơjă noh ưh đei tŏk. Nhen khei năr âu sơnăm sơ̆ adoi đei lơ bơngai răt bơih, pơtêng hăm sơnăm sơ̆ noh dang ei tam mă ƀôh ƀă kiơ ôh”

Băt hơdrol tơdrong tơjur lơ̆m tĕch răt tơmam drăm ah khei Têt sơnăm âu, lơ bơngai tĕch pơdro tơ̆ Đăk Lăk hlôi chă hơlen băt tơdrong kăl, lăp yua đơ̆ng bơngai yua vă chă trong akŏm, asong tơmam drăm. Minh ƀar bơngai pơdro adoi pơih să dôm trong tĕch tơmam kiơ̆ điê̆n thoăi, website, dôm tai khuan mạng tơpôl nhen facebook, zalo vă gơh tơrĕk truh hăm bơngai răt hloh. Dôm tơdrong tơlĕch tơjur kơjă, tĕch minh asong minh, atŭm hăm tơdrong tơplih ‘nao trong tơbang tơmam drăm adoi đei dôm bơngai pơdro iŏk yua hơvơn đei lơ bơngai hơlen chă răt yua. Pơmai Nguyễn Hằng Nga, tơ-‘ngla anih tĕch hơbăn ai tơroi: “Lăng atŭm sơnăm âu hăp adar hloh, bơngai răt ưh đei lơ. Bơngai juăt noh adoi truh mă lei nhen hơdrol ki đe sư răt 10 noh dang ei răt 5-6 đĕch, oei bơngai ưh kơ juăt noh roi tŏ sĕt hloh. Bơngai pơdro hơdrin pơtoi tĕch, minh ƀar tơmam tŏk kơjă mă lei ba duh ưh kơ khĭn hơtŏk kơlih bơngai juăt răt đơ̆ng sơ̆ bơih, ba hơtŏk kơjă noh ưh kơ hiôk ôh, noh vei kơjă tĕch nhen đêl so noh mă đei đe chă răt, phŏ dôm tơmam ưh khĭn hơtŏk kiơ̆, ưh đei yua lơ mă lei vă pơtoi vei sơđơ̆ng găn ga khei năr tơnap tap đĕch”

Ưh hơdrô̆ tĕch tơmam yua khăi kơ bơngai răt mă anih tĕch pơkao jơdri iĕ (pơkao rŭng reng) adoi khăi kơ bơngai răt. Ƀok Quang Thế Phong, minh tơ-‘ngla anih tĕch pơkao jơdri iĕ tơ̆ xah Hòa Phú, pơlei tơm Buôn Ma Thuột tơroi, sơnăm âu hơyuh ‘năr tơtŏ ‘lơ̆ng ăn jang pơtăm pơkao jơdri iĕ hleh hla păng akŏm ăn tơm chôh pơkao trŏ ah khei puih mak. Pơyan pơkao Têt sơnăm âu, ƀok Phong pơtăm 3.000 tơm pơkao jơdri iĕ, hăm lơ sơnăm phara băl.

Dang ei ƀok tŏk bŏk tah pơkao lơ̆m kơbô̆i vă ‘nhăk tĕch. Pơyan pơkao sơnăm âu kơsô̆ pơkao tĕch tơlĕch lơ hloh sơnăm sơ̆ pơhlom 500 tơm, mă lei ưh đei yua lơ ôh: “Kơjă tĕch sơnăm âu ưh đei nhen dôm sơnăm nai, kơlih pơkao jơdri iĕ đơ̆ng tơring nai pơtruh lơ hloh. Pơtih nhen minh tơm ah sơnăm sơ̆ tĕch đei jê̆ 4 trĭu hlj noh Têt sơnăm âu athei tơjur oei pă 3,5 trĭu dah mă 3 trĭu đĕch. Bơngai jang pơgar nhôn athei kơdih hơmet tơjur kơjă vă tơgar hăm pơkao đơ̆ng tơring nai truh. Dang ei pơgang pơkao hnam inh chă tĕch hơkŏm ăn dôm bơngai pơdro, păng kơsô̆ oei noh gô ‘nhăk tơ̆ cham pơhiơ̆ Buôn Ma Thuột tĕch ah năr 22/12 âm lĭch truh âu kơnh”

Kon pơlei kơhret pơhuach păng tơdrong tơplih gah tơdrong juăt răt yua tơmam drăm Têt đơ̆ng rim unh hnam pơm ăn tơdrong tĕch răt tơmam Têt tơ̆ Đăk Lăk jing rơnguơ̆ rơngot. Bơngai pơdro păng anih tĕch pơdro ưh khĭn iŏk lơ tơmam drăm, mă thoi noh rim bơngai adoi oei gơnơm lơ̆m tơdrong hăt hot chă tĕch răt lơ̆m dôm năr tơjê̆ Têt, khei năr dôm bơngai pơm jang đei chôt vih pơlei pơla păng đei iŏk jên khei hơpah jang.