Tơ̆ jơ bơ̆ jang, Anih vei lăng kon pơlei dêh char Đắk Lắk roi tơƀôh 18 tơdrong ƀơm truh tơdrong pơmat tat, tơhlăk tăk lơ̆m tơdrong vei lăng teh đak găh tơmam drăm păng cham char. Lơ̆m noh, tơdrong tơhlăk lơ hlŏh jĭ vei lăng teh đơ̆ng mir đak lar. Kơmăy chih răk kơsô̆ găh bri ‘long tam hơmet kĕh, tam mă hrơ̆ch ‘lơ̆ng hăm dôm kơsô̆ chih jô̆ găh teh. Đei lơ teh đơ̆ng Mir đak lar pơjao ăn tơring yoa Anih vei lăng kon pơlei tơ̆ xăh vei lăng, tam mă đei anih vei lăng tơpă, lơ hơgăt teh đei đe bơbĭt, tơgar iŏk. Đơ̆ng noh, pơm tơlĕch tơdrong pơmat tat ăn tơring lơ̆m tơdrong iŏk yoa teh kiơ̆ trong tơproh jang. Anih vei lăng kon pơlei dêh char Đắk Lắk hlôi tơlĕch trong jang atŭm găh vei lăng, iŏk yoa teh đơ̆ng mir đak lar pơjao, tơroi ăn Anih tơm vei lăng tơmam drăm păng cham char păng dôm anih jang kơ trung ương mă lei truh dang ei tam mă đei hơlen năng păng tơlĕch nơ̆r pơtho.

Ƀok Nguyễn Thiên Văn, Phŏ Kơdră vei lăng kon pơlei dêh char Đắk Lắk pơma: “Tơdrong tơgar băl, tơkêng tơhlâu, tơjră băl yoa đơ̆ng teh tơ̆ dôm tơdrong choh jang xa, pơtăm ‘long păng dôm công ty choh jang xa tơ̆ dêh char oei tôch lơ. Tơdrong sek tơlang teh đơ̆ng tơgar băl păng iŏk pơdreu teh đơ̆ng đe bơbĭt iŏk, oei tơƀâp lơ pơmat tat, tam mă đei trong jang ‘lơ̆ng vă gơ̆h sek tơlang tôch.”

Kŭm hăm pơmat tat, tơhlăk tăk ƀơm truh tơdrong vei lăng teh đơ̆ng mir đak lar, Anih vei lăng kon pơlei dêh char Đắk Lắk kŭm pơma tơƀôh lơ tơdrong kăl đei Anih tơm vei lăng tơmam drăm păng cham char kŭm hăm dôm anih jang tơ̆ trung ương sek tơlang ăn. Mă loi ƀât mă Luơ̆t teh 2024 tam mă đei tơmât yoa, tơdrong jang kiơ̆ dôm nơ̆r hơgăt lơ̆m Luơ̆t teh 2013 păng dôm hla ar chih hơgăt luơ̆t oei đei 1,2 tơdrong ưh kơlăp, tơjră băl, kăl đei set hơlen, pơtho tơƀôh trong sek tơlang. Tơdrong hơgăt iŏk yoa teh đơ̆ng Đắk Lắk truh sơnăm 2025 đei Thủ tướng teh đak pơjao tơ̆ tơdrong Tơchơ̆t 326 sơnăm 2022 tam mă pơm lăp hăm tơdrong ‘mĕh vă tơ̆ yăn âu. Luơ̆t tơmam Khoáng sản păng dôm nơ̆r pơtho pơm hla ar asong jang găh khoáng sản oei tam mă rơđăh, pơm đunh, tam mă lăp hăm tơdrong sir iŏk tơmam bri brăh vă pơm tơmam ming man, mă loi jĭ sir kôch, tuh kơlơ̆p teh…

Pơma pơtôch jơ bơ̆ jang, Kơdră tơm vei lăng tơmam drăm păng cham char Đặng Quốc Khánh ăn tơbăt, khul jang đơ̆ng anih tơm bơ̆ jang hăm dôm dêh char vă chă trong hơmet pơ ‘lơ̆ng dôm tơdrong pơmat tat, tơhlăk tăk ăn tơring. Atŭm hăm ‘nŏh, iŏk nơ̆r tơgop đơ̆ng dôm tơring vă jăh chih pơjing, hơmet pơ kĕh tơdrong Hơgăt tơmât Luơ̆t teh 2024 lơ̆m tơdrong arih xa. ‘Nâu jĭ luơ̆t tôch gĭt kăl ƀơm truh tôch dêh hăm tơdrong arih xa, tơpôl. Lơ̆m noh, Ƀok Kơdră tơm tơtă ăn dêh char Đắk Lắk athei kơchăng, adrin chih tơlĕch hrôih kơjă teh, chih hơmet tôm kơsô̆ teh vă mưh Luơ̆t teh ‘nao đei tơmât yoa ‘nŏh gơ̆h jang kiơ̆ hloi. Hơdai hăm ‘nŏh, dêh char năng kăl truh tơdrong sek tơlang dôm tơdrong tam mă keh ‘lơ̆ng mă Anih vei lăng tơmam drăm, cham char gơ̆h jang hloi ‘nŏh jĭ tơdrong pơm hla ar teh ăn kon pơlei vă gơ̆h oei xa, jang xa sơđơ̆ng ‘lơ̆ng, ưh đei tơgar băl, ưh đei pơm glăi luơ̆t.   

Hơdrô̆ hăm tơdrong tơtŏ dêh hlŏh dang ei ‘nŏh jĭ teh đơ̆ng mir đak lar, Ƀok Kơdră Đặng Quốc Khánh athei dêh char Đắk Lắk hơlen năng mă tôm vă mưh Luơ̆t teh 2024 đei tơmât yoa ‘nŏh gơ̆h sek tơlang ‘lơ̆ng hloi. Ƀok Kơdră hơnơ̆ng pơma truh tơdrong athei vei lăng ‘lơ̆ng tơdrong đei yoa ăn kon pơlei păng anih jang đei ƀơm truh tơ̆ teh đơ̆ng mir đak lar: “Athei Anih vei lăng kon pơlei dêh char, Kơdră chĕp kơ̆l đảng dêh char pơtho tơƀôh chih hơmet mă tôm teh đơ̆ng mir đak lar. Adrol sơ̆ đei tơdrong iŏk tơmât teh kon pơlei lơ̆m mir đak lar, dang ei jang hơdoi ‘nŏh kon pơlei hăm mir đak lar, công ty tơgar băl. Kơlih thoi noh mưh jang hơdoi, mưh pơm hla ar tơplih teh ưh đei hơlen, ưh đei pơtŏ hơmet, ưh đei chih hơdăh kơsô̆ teh đang kơ ‘nŏh bơbĭt tơgar iŏk. Inh athei hơlen năng păng chih hơdăh dôm kơloăi teh. Công nhân jĭ kon pơlei bơ̆n ‘năi, đe oei tơ̆ noh dôm jĭt sơnăm bơih, yoa kiơ mă pơmat tat. Bơ̆n athei pơm pơ ‘lơ̆ng tơdrong đei yoa đơ̆ng kon pơlei, đơ̆ng anih jang hai. Luơ̆t đei yoa, teh mir đak lar, mă lei kon pơlei đĭ oei xa sơđơ̆ng đơ̆ng sơnăm 2004 bơih, jô̆ hloi teh choh jang xa, tĕh oei athei ƀơk ăn kon pơlei. Oei teh oei tơgar băl ‘nŏh athei tơblang hơlen dơ̆ng adrol sơ̆ thoi yơ. Yă kiơ gơ̆h pơm kiơ̆ luơ̆t ‘nŏh iĕm athei jang hơdrol.”

Kơdră tơm vei lăng tơmam drăm păng cham char oei athei dêh char Đắk Lắk hơtŏk tơdrong vei lăng teh đak găh tơmam khoáng sản, đak, hơmet pơ ‘lơ̆ng râm rĕk, kơchơ̆t ‘mê̆ ‘mach; bơngai jang tơ̆ anih vei lăng tơmam drăm păng cham char, yoa truh âu kơnh gô đei pơjao hơdăh truh 70% tơdrong jang đơ̆ng Anih tơm ăn dêh char. Ƀok Kơdră oei athei dêh char Đắk Lắk năng kăl truh tơdrong tang găn unh xa bri lơ̆m pơyan phang âu, ƀât mă lơ tơdrong ăn ƀôh pơyan tŏ phang sơnăm tôch dêh.