Đơ̆ng mơjĭt năr adrol ki, ‘nhŏng Nguyễn Xuân Lộc, tŏk bŏk oei akŏm tơ̆ tơring khop  Ea Tul, xah Ea Tul, apŭng Cư Mgar atŭm hăm kon pơlei kiơ̆ khop vang chă pơrŏ hnam hơkŭm, vai dôm kơtŏl hơmlei, pơklep ƀăng keo tơ̆ hơgơp tơmo tih tơ̆ hnam khop atŭm kơ tơring. Bơngai chă pơlăp chô̆ unh, bơngai noh dui tơlei unh, bơngai noh hơmet pơrŏ hơgơp tơmo, bơngai pơrŏ ‘măng jang. Rim bơngai adoi hăt hot ngăl: “Lơ̆m tdrong sô̆ sơng Nô-el, inh atŭm hăm rim bơngai lơ̆m tơring khop Ea Tul pơrŏ hơgơp tơmo vă sơng Ƀok dŏng hoai jur, vă ăn rim bơngai đei minh pơyan Nô-el gơh sơđơ̆ng, grasia, inh ƀôh chơt hơ-iă dêh!”

Khei năr âu, mă oei hăt hot hăm tơdrong pĕ yua kaphê, mă lei kon pơlei kiơ̆ khop kŏng yăo tơ̆ tơring âu, bu bu adoi asong jơ vă pơ-‘nguaih pơrŏ hnam oei, sơng Giĕng tih Nô-el păng sơnăm ‘nao jê̆ truh. Pơmai Hly Ktla, tơ̆ xah Ea Tul, apŭng Cư Mgar chơt hơ-iă tơroi, sơnăm âu kơjă dôm tơmam choh pơtăm adoi tŏk kăp, kon pơlei đei yua ƀiơ̆ noh hơmet sơng nô-el hăm jơhngơ̆m đon tôch sô̆ sôn: “Sơnăm âu unh hnam inh adoi hơmet pơm hơgơp tơmo vă sơng Ƀok dŏng hoai đei rơneh. Sơnăm âu pha hăm rim sơnăm, kơlih kơjă kaphê tŏkkăp, noh jing tơdrong sô̆ sôn hloh ‘noh sơnăm âu rim bơngai adoi sô̆ hơ̆k ngăl”

Ƀok soi Hoàng Nguyên Vũ vei lăng tơring khop Ea Tul ăn tơbăt, nô-el sơnăm âu kon pơlei sô̆ sôn hloh ƀơ̆t hnam hơkŭm tŏk bŏk oei đei ming man ‘nao. Hơmet ăn giĕng tih Nô-el sơnăm âu, đơ̆ng blŭng khei 12, kon pơlei kiơ̆ khop hlôi atŭm băl chă tơgop tơmam drăm, atŭm hăm ƀok soi tơ̆ tơring, khul pơgơ̆r khop hơmet ăn minh Pơyan Nô-el sơđơ̆ng, tơnăp, tơƀôh đon bơnôh “kŭp kơ Băyang, ‘mêm kơ teh đak”, tơguăt tơguăl kon pơlei: “Noel sơnăm âu adoi hơmet pơm tông, khop apinh. Hăm kon pơlei Nô-el noh jing giĕng tih kơ kon pơlei adoi tơnăp mơ̆n. Mă kăl tơ̆ Ea Tul noh nhen lĕ rim unh hnam adoi pơm hơgơp tơmo vă sơng nô-el, đon bơnôh kon pơlei chơt hơ-iă dêh. Sơnăm âu đei jơnei pơgơ̆r tơring asong ming man anih hơkŭm ‘nao, âu adoi jing tơdrong sô̆ noh kon pơlei hăt hot, kơdih tơpang ti po man hnam hơkŭm mă ưh kơ kăl chă hơpah đe nai”

Apŭng Cư Mgar đei 5 tơring khop, 2 khul khop păng 1 anih akŏm khop kŏng yăo, ƀok Vũ Hồng Nhật, Kơdră Anih jang vei lăng kon pơlei apŭng Cư Mgar ăn tơbăt, pơyan nô-el sơnăm âu, apŭng hlôi asong 5 khul jang truh hơpong, asong tơmam păng atŭm sô̆ hăm dôm anih pơgơ̆r khop. Atŭm hăm noh pơgơ̆r dôm xah, thĭ trâ̆n chă hơvơn anih jang tơgŭm vă truh hơpong, asong tơmam ăn kon pơlei kiơ̆ khop mă đei tơdrong hơrih tơnap tap gơh sơng minh pơyan Nô-el sơđơ̆ng tơnŏ: “Pơyan Nô-el sơnăm 2023 âu, Anih jang vei lăng kon pơlei apŭng pơgơ̆r dôm xah, phương, tyhĭ trâ̆n đei tơring khop noh tơrĕk tơgŭm ăn kon pơlei gớh ơng pơyan nô-el sơđơ̆ng kiơ̆ trŏ dôm tơchơ̆t đơ̆ng khôi luơ̆t teh đak păng mă kăl kơchăng tơgŭm ăn dôm unh hnam kiơ̆ khop hin dơnuh, tơchơ̆t sơng giĕng tih nô-el phĭ tơtŏ, dơnŏ ‘lơ̆ng”

Ƀok Dương Văn Tuệ, Phŏ Kơdră Juăt jang kơ Anih jang Tơguăt tơguăl kon Khop dêh char Đăk Lăk ăn tơbăt, jâ̆p dêh char đei 100 anih soi ƀlŏk hnam hơkŭm hăm hloh 217.000 bơngai kiơ̆ lui. Sơnăm 2023 tơdrong hơrih kon pơlei kiơ̆ Khop lơ̆m tơring teh kơ dêh char đei hơtŏk ‘lơ̆ng. Dôm tơdrong jang ‘mêm bơnat; dôm tơdrong jang vei sơđơ̆ng tơpôl tơ̆ dôm tơring khop; tơdrong jang “Tôm kon pơlei tơguăt tơguăl pơjing tơring tơrang ‘nao păng tơring kơdrrơ̆m gơh hơgei”… adoi đei kon pơlei kiơ̆ Khop pơm kiơ̆ tơnăp păng tơgop pơjing pơlei pơla Đăk Lăk roi năr roi pơdrŏng ‘lơ̆ng rŏ: “Sơnăm 2023 kon pơlei kiơ̆ khop hlôi pơlong pơm jang vă hơtŏk mŭk drăm, hơtŏk tơdrong hơrih unh hnam. Tơdrong sơng Giĕng tih Nô-el tŏk bŏk oei ƀôh rơ-ông rơ-ang tơ̆ dôm tơring khop, păng tơring kon pơlei oei xa lơ̆m jâ̆p dêh char. Minh pơyan chơt hơ-iă tŏk bŏk oei pơlan să lơ̆m tơpôl kon pơlei kiơ̆ khop tơ̆ pơlei tơm adoi nhen tơ̆ dôm tơring ataih yaih”

Minh pơyan Nô-el dơ̆ng truh lơ̆m tơdrong chơt hơ-iă ‘nă hal hăm kon pơlei kiơ̆ khop Đăk Lăk. Rim bơngai adoi dăp đon dăp bơnôh khop apinh păng hơpơi đei minh pơyan Nô-el sơđơ̆ng ‘lơ̆ng, minh sơnăm ‘nao jơnap sô̆ sôn.