Hơnih jang ŭnh hơyuh Dak Lăk hrei ou tŏk bok vei lăng 14 hơnih biên ap 110kV hăm hloh 1.200 kmăi kmŏk ou to. Lơ̆m pơyan ‘mi, Kong ty Ŭnh hơyuh Dak Lăk hlôi iung jang ƀar ‘măng jang pơlong năng sơđơ̆ng tơ̆ rim hơnih biên ap, dăr lăng hơmet pơ ‘lơ̆ng kmăi kmŏk, tơlei ŭnh hơyuh vă sơđơ̆ng pơtruh ŭnh hơyuh iŏk đei jơnei.Tơdrong jang pơlong năng tơ̆ rim hơnih ƀiên ap 110kV akŏm găh lơ akŏm lơ̆m lăng hơlen pơtruh ŭnh hơyuh, val tang găn grơ̆m glăih, tơlei kap kĕ krơ̆ng ... mư̆h ‘năr ‘mi kial hơbŭt hơbông. Adoi, rim hơnih jei ăn khul bơ̆ jang năm dăr lăng, hơmet ming dôm hơnih pă gan ‘lơ̆ng kơjăp păng hơmet ming dôm tơdrong ưh kơ ‘lơ̆ng tơ rim hơnih biên ap. Hlŏh đơ̆ng ‘măng iung jang pơlong, ŭnh hơyuh Dak Lăk hlôi tơtom ƀôh, hơmet ming 15 tơdrong tim mă ‘lơ̆ng đei ƀơm truh găh kmăi rơle tômơtĭk, hơmet ming kmăi kmŏk tôm vă pơm dă ƀiơ̆ đei tơdrong hư răm, pơm hơtŏk bơ̆ jang pơtruh ŭnh hơyuh sơđơ̆ng ‘lơ̆ng hơ iă.