Khei năr au, kon pơlei pơtăm sâu riêng tơ̆ Đăk Lăk tŏk bŏk yak mơ̆t lơ̆m pơyan phĕ. Mĭnh năr đei kơ hrĕng gre container tih kơjung păng lơ kơ loăi gre chơ tơmam drăm, gre kŏng nong, gre bơbĭt ... chơ plei sâu riêng kơdau tơ̆ rim trong năm tĕch mơdro. Khul kŏng ang vei lăng trong nơnăm tŏk bŏk tơlĕch jang kơtang dăr lăng vă pơm sơđơ̆ng dơ̆ng kơjăp, sơđơ̆ng trong nơnăm.

Vă sơđơ̆ng trong nơnăm, khul kanh sat vei lăng trong nơnăm ăn 100% khul jang iung jang dăr lăng ưh kơ lê̆ đei tơdrong tơhlăk trong nơnăm, ưh kơ đei gre chă tơtơ̆m, tơprĕh dih băl; adoi athei rim bơngai vơ̆r gre container kĭ pơkăp pơm kiơ̆ kơjăp Khôi luơ̆t trong nơnăm, ưh kơ chơ hloh tơdrong pơkăp, ưh kơ vơ̆r grenh, ploi kư̆ kă … Dêh char Đak Lăk đei hloh 22.500 ha sâu riêng, akŏm să tơ̆ rim apŭng Cư M’gar, Cư Kuin, Ea Kar, Krông Ƀuk, Krông Năng, Krông Pach, Ea Hleo păng thĭ xah Ƀuôn Hồ. Lơ̆m au, hloh 10.000 ha tŏk bŏk phĕ plei, hăm iŏk đei lơ̆m sơnăm 2023 ‘nŏh dang 185.000 tân plei.