Dêh char Đắk Lắk dang ei đei dang 150 HTX choh jang xa, hlŏh 270 tŏ pơgar xă, anih rong kon tơrong păng hlŏh 15.500 unh hnam kon pơlei jang chŭn mir đei trong jang xa hơdai păng tĕch tơmam hăm anih tĕch mơdro. Tơdrong vang jang hơdoi hơnhăk đei yoa tôch lơ ăn dôm pang vang jang. Dôm anih tĕch mơdro, HTX đei trong tĕch tơmam sơđơ̆ng ‘lơ̆ng; chă đei anih răt tơmam ăn kon pơlei kiơ̆ đơ̆ng trong jang hơdoi, hla ar pơkăp răt tơmam, chă tơdrong jang ăn kon pơlei. Kŭm hăm ‘nŏh, tơdrong jang hơdoi oei jang đei tơmam rơgŏh ‘lơ̆ng, chih hơdăh anih jang đei tơmam ăn bơngai răt. Tơdrong tơmât yoa dôm ki thuơ̆t rơgei lơ̆m tơdrong choh jang xa găn ƀiơ̆ tơdrong pơm ‘mê̆ ‘mach cham char.

‘Nao âu, Anih vei lăng kon pơlei dêh char Đắk Lắk pơgơ̆r hop akŏm hơlen năng 5 sơnăm bơ̆ jang kiơ̆ Tơdrong hơgăt 98 sơnăm 2018 đơ̆ng Khul kơdră tĕh đak. Tơ̆ Hop akŏm, dôm bơngai tang măt tơlĕch nơ̆r pơma, apinh, tơƀôh lơ trong bơ̆ jang dôm tơdrong jang, trong jang hơdoi păng tĕch tơmam đơ̆ng choh jang xa đei. 

Ƀok Huỳnh Bài, Kơdră vei lăng Grŭp HTX dêh char Đắk Lắk đei nơ̆r pơma: “Grŭp HTX dêh char hơpơi ‘mĕh đei tơdrong pơngơ̆t găh tơdrong pơtho ăn khul bơngai jang, mă 2 ‘nŏh pơjing tơdrong hiôk hian vă dôm HTX gơ̆h đei tĕh jang pơih xă tơring pơtăm pơm tơmam kŭm nhen man hnam kho, anih mong vă pơyoa ăn tơdrong choh jang xa. Hăm Khul kơdră pơgơ̆r tơring kŭm nhen anih tĕch mơdro kalw đei trong jang hơdoi vă chă đei anih răt iŏk tơmam đơ̆ng HTX sơđơ̆ng ‘lơ̆ng”.

Ƀok Huỳnh Bài oei tơroi dơ̆ng, ‘nao âu Grŭp HTX dêh char Đắk Lắk pơgơ̆r et hơtŏk anih pơdă tơmam vă ming tơƀôh dôm tơmam đơ̆ng HTX jang đei păng dôm tơmam OCOP. Anih âu pơm ƀât kơsô̆ 88 trong Điện Biên Phủ, phường Thành Công, plt Buôn Ma Thuột, ming tĕch 151 kơloăi tơmam đơ̆ng 25 HTX lơ̆m dêh char. Anih ming pơdă dôm tơmam đơ̆ng Grŭp jang hơdoi, HTX păng tơmam OCOP gô jing anih chă trong tĕch tơmam tôch đei yoa đơ̆ng HTX hăm dôm anih răt tơmam păng tĕch ăn bơngai răt nai hai.

‘Nao âu, Anih vei lăng kon pơlei dêh char Đắk Lắk dai pơgơ̆r Hop akŏm pơtôch 3 sơnăm tơlĕch Trong jang atŏk tơiung mŭk drăm atŭm, HTX đơ̆ng 2021 - 2025 păng Tơdrong jang đơ̆ng Anih vei lăng kon pơlei dêh char jang kiơ̆ nơ̆r pơtho đơ̆ng Anih tơm Chinh trĭ găh hơnơ̆ng tơplih ‘nao, jang tŏk păng pơm hơtŏk tơdrong đei yoa đơ̆ng mŭk drăm atŭm lơ̆m chăl ‘nao.

Lơ̆m 3 sơnăm blŭng tơlĕch Trong jang atŏk tơiung mŭk drăm atŭm, HTX, dêh char Đắk Lắk hlôi tơgŭm pơjing ‘nao 57 HTX; tơgŭm ăn dôm HTX bơ̆n kơmăy kơmŏk, tơplih ‘nao kơmăy kơmŏk, pơjing hơnăn tơmam, pơjing trong tĕch tơmam tơm tơ̆ tơring… hăm kơsô̆ jên hlŏh 6 ti. Dôm tơdrong tơgŭm nai nhen, tơgŭm ăn bơngai jang oei mơlôh mât bơ̆ jang lơ̆m Anih jang mŭk drăm atŭm; tơjur jên thuê tĕh, pơdui khei ‘năr kla hre, sut hŭt jên hre thuê̆; tơgŭm man anih jang, anih pơm tơmam ăn dôm HTX choh jang xa... đei anih jang kơpal, tơring tơrang bơ̆ jang kiơ̆. Anih mong jên atŏk tơiung HTX dêh char Đắk Lắk đĭ tơlĕch ăn 32 HTX tŏk iŏk hlŏh 19 ti hlak; Anih mong jên tơgŭm chă tơdrong jang oei asong ăn 8 HTX tŏk iŏk hlŏh 1 ti hlak jên vă jang xa.

Ƀok Nguyễn Thiên Văn, Phŏ Kơdră vei lăng kon pơlei dêh char Đắk Lắk ăn tơbăt, đei lơ HTX, grŭp jang hơdoi tơ̆ tơring đei trong jang xa iĕ, jên jang tŏ sĕt, tơdrong jang hơdoi oei tam mă pran. Vă jang đei đon pơhnŏng truh sơnăm 2030, dêh char đei dang 800 HTX păng 1.000 Grŭp jang hơdoi, ƀok Nguyễn Thiên Văn ăn tơbăt: “Lơ̆m khei ‘năr truh athei hơtŏk hlŏh dơ̆ng tơdrong pơjing, hơmet kơjăp HTX kiơ̆ Luơ̆t HTX sơnăm 2012 păng truh âu kơnh, ‘năr 1/7/2024 vă tơlĕch jang kiơ̆ Luơ̆t HTX sơnăm 2023. Lơ̆m luơ̆t HTX sơnăm 2023 đei 8 grŭp tơgŭm păng tơdrong jang kơmăy đei tơgŭm hơdrô̆. Athei Anih chĕp kơ̆l đảng, khul kơdră pơgơ̆r dôm anih jang kơpal tơrĕk truh, pơ ‘nhŏ hơdrol jên, tơmam vă tơgŭm ăn kon pơlei jang chŭn mir kiơ̆ đơ̆ng anih dơ̆ng tang ăn đe sư, đei thoi nŏh ‘nŏh tơdrong tơmât yoa kơmăy sô̆, tơmât yoa khoa hŏk ki thuơ̆t ‘nao, tơmât yoa dôm tơdrong hơgăt ‘lơ̆ng mưh jang xa tơ̆ rim anih jang, thoi nŏh gơ̆h đei tơdrong tơplih ‘nao ‘lơ̆ng lơ̆m dêh char.”

Gơ̆h pơma, dôm sơnăm âu ki mŭk drăm tơpôl tơ̆ Đắk Lắk hlôi tŏk pran găh tơmam păng jang đei tơmam roi ‘lơ̆ng, vang tơgop tih lơ̆m tơdrong tơplih ming trong choh jang xa, pơm hơtŏk kơjă tơmam, vang pơm tơplih ‘lơ̆ng ăn um ai tơ̆ tơring tơrang.