Tơ̆ tơdrong jang, bơngai tang măt đei mơ̆ng roi tơbăt găh tơmam ‘lơ̆ng păng dôm jơnei hơtŏk tơiung mŭk drăm, tơpôl kơ dêh char Dak Lak lơ̆m khei ‘năr âu ki. Kon pơlei đơ̆ng teh đak bơ̆n oei tơ̆ teh đak đe tơƀôh jơhngơ̆m chơt hơiă hăm dôm tơdrong tơplih găh um ai păng tơdrong hơtŏk tơiung mŭk drăm - tơpôl kơ Dak Lak; tơroi dôm đon tơchĕng, hơpơi ‘meh đơ̆ng kon pơlei hơtăih kơ pơlei, ‘meh vă dêh char hơnơ̆ng pơm tơdrong hiôk vă kon pơlei đơ̆ng teh đak bơ̆n oei tơ̆ teh đak đe tơmơ̆t jên jang găh mŭk drăm, tơgop pơjing păng hơtŏk tơiung pơlei pơla.

Iung pơma tơ̆ tơdrong jang, yă H Yim Kđoh, Phŏ Kơdră Anih vei lăng kon pơlei dêh char Dak Lak tang măt kơdră chĕp kơ̆l dêh char chih iŏk, pôk pơ ư dôm tơdrong tơgop đơ̆ng dôm kon pơlei đơ̆ng teh đak bơ̆n oei tơ̆ teh đak đe lơ̆m dôm sơnăm âu ki; pơma hơdăh Đảng, teh đak bơ̆n ling lang bơngơ̆t truh păng lăng kăl tơpôl bơngai Việt Nam oei tơ̆ teh đak đe ‘noh jĭ 1 khŭl gĭt kăl ưh kơ gơh tơklăh hơdrô̆, jing 1 tơdrong ‘lơ̆ng hơtŏk tơiung kơ teh đak, kơ dêh char.