Tơdrong jang đei pơgơ̆r tơ̆ Hnam trưng hŏk jăl 3 Lê Quý Đôn (pơlei tơm Buôn Ma Thuột), sơng đei hloh 1.600 đoàn viên hơdruh tơdăm păng hŏk tro lơ̆m dêh char vang akŏm. Đe oh đei lăng pơm tông “Nơ̆r pơtruh ‘nĕ jô̆ yo đĭ klui bơih” păng tơƀôh ‘măng sek tơlang tơdrong pơrơ̆ng pơm ăn jĭ rơka. Kiơ̆ đơ̆ng noh tơƀôh ăn tơdrong răm đơ̆ng dôm ‘măng pơ rơ̆ng pơm ăn jĭ rơka hăm bơngai đei răm, bơngai ŭnh hnam đei răm păng pơđĭ dôm tơdrong pơrăm hăm kơ dih kâu păng ŭnh hnam bơngai pơm glăi.

Đơ̆ng rŏng kơ pơtôch ‘măng sek tơlang ‘noh tơdrong pơma dơnuh, apĭnh, tơl nơ̆r tơgep tơroi tơbăt khôi luơ̆t. Tơdrong tơm tơroi tơbăt ‘moi kiơ̆ dôm nơ̆r apĭnh, tơdrong đei ƀôh vă hŏk tro, đoàn viên, hơdruh tơdăm tơroi đon tơchĕng găh teh dŏng đơ̆ng hŏk tro, trong hơmet pơ ‘lơ̆ng mưh ƀôh teh dong băl đơ̆ng hŏk tro; hơnăp jang đơ̆ng rim bơngai, mă loi ‘noh jĭ hŏk tro vă tang găn tơdrong teh dong đơ̆ng hŏk tro.