‘Nau 1 lơ̆m dôm tơdrong đei Hơnih chĕp pơgơ̆r ‘măng pơlong lĕch ‘măng khoă jăl pêng sơnăm 2023 dêh char Đak Lăk tơbăt hơdăh tơ̆ hop akŏm tơroi tơbăt kơtơ̆ng ang găh ‘măng pơlong lĕch ‘măng khoă jăl pêng vă jê̆ pơgơ̆r.

‘Măng pơlong sơnăm au, lơ̆m dêh char Đak Lăk đei hloh 21.000 ‘nu hŏk tro vang pơlong, lơ̆m au hŏk tro kon kông tơmơ̆t 28%. Găh hơnih pơlong đei 33 hơnih tơm hăm 900 lăm pơlong. Truh dang ei, rim hơnih hlôi jang keh đang hơmet ‘lơ̆ng tơmam drăm, kmăi kmŏk tơ̆ rim hơnih pơlong, hơnih kơpi tơdrong pơlong păng hơnih chơ̆m điêm pơlong kiơ̆ tơdrong tơchơ̆t. Tơl nơ̆r apĭnh găh jơhngơ̆m đon tơtăm đơ̆ng đe hŏk tro păng ŭnh hnam hŏk tro đơ̆ng rŏng ‘măng tơdrŭt tơ̆ hơnih bơ̆ jang vei lăng kon pơlei ƀar tơring kơ apŭng Cư Kuin, Hơnih chĕp pơgơ̆r pơlong tơbăt, tŏk bŏk bơ̆ jang ‘lơ̆ng tơdrong jang pơrô̆ pơrôp, hơlêm jơhngơ̆m đon vă hŏk tro sơđơ̆ng jơhngơ̆m đon năm pơlong. Adoi sơkơ̆t hơdăh hlôi hơmet tôch kơ brĕ, sơđơ̆ng dơ̆ng kơjăp ăn dôm năr pơgơ̆r pơlong au.