Ƀok Y Bhăng Mlô, tơring Ea Tul, apŭng Cư M’gar đei 1ha 5 sao chehphe tŏk bŏk plei tơ̆ bro buôn Sah A, sơlam hăm tơring Cư Dliê M’nông. ‘Nau jĭ bro mir, ưh kơ đei kon pơlei oei, dôm sơnăm hơdrol đe hơnơ̆ng phĕ tơtông chehphe. Ƀok Y Bhăng tơroi, ƀôh hơdăh đơ̆ng dôm sơnăm hơdrol, sơnăm au rim uưnh hnam đei mir chehphe tơ̆ bro au hlôi iung jang hơdoi hăm kŏng ang tơring pơjing hơnih gak vei lăng năng tông mir pơgar chehphe. Rim năr hơnih au hơnơ̆ng dăr joang, vei lăng mir chehphe mă kăl tơ̆ gơmăng. Kơ yuơ lơ loh, tơdrong đe chă tơtông chehphe đum pă đei ƀôh bơih. Ƀok Y Bhăng Mlô pơma:“Hơnih gak bơ̆n đei 2 ‘nu kon pơlei jang hơdoi hăm khul kŏng ang tơring, mư̆h truh gơmăng ‘nhŏng oh năm dăr joang pr sơlam tơring Cư Dliê M’nông hăm tơring Ea Tul năm dăr joang vei lăng đơ̆ng gơmăng truh 9 jơ ‘nŏh brŏk pơdơ̆h tŏ sĕt păng đơ̆ng 11 jơ dăh mă 11jơ 30 pơnĭt gơmăng năm dăr joang dơ̆ng păng truh 1jơ, 2 jơ ‘nŏh mă brŏk pơdơ̆h. Dôm bơngai tơtông ƀôh ‘nhŏng oh vei lăng prăt măng prăt năr lơ loh đe sư jei hli, ưh kơ pơ̆n mơ̆t lơ̆m mir chă tơtông klĕ bơih.”

Ea Tul ‘nŏh tơring đei mir pơgar chehphe să hlŏh lơ̆m apŭng Cư Mgar hăm 2.000ha. Thiếu tá Đặng Trọng Minh - Kơdră kŏng ang tơring tơbăt, tơring đei 10 pơlei păng 1 thôn. Rim pơlei hrei au jei hlôi đei chă pơlăp camera dăr lăng sơđơ̆ng dơ̆ng kơjăp. Mă lei dôm sơnăm hơdrol, tơring oei đei đe chă tơtông klĕ chehphe tơ̆ mir, mă kăl rim pro hơtaih pơlei. Tơ̆ hơnăp tơdrong au, kŏng ang tơring hlôi pơchoh trong ăn kơdră Đảng tơring pơjing rim hơnih gak, khul jang dăr joang vei lăng năng tông chehphe ăn kon pơlei prăt khei ‘năr phĕ. Thiếu tá Đặng Trọng Minh pơma:   “Nhôn pơjing đơ̆ng 3-4 hơnih gak vei lăng năng tông, mĭnh hơnih đei đơ̆ng 3-5 ‘nu, oei tơ jê̆ mir pơgar chehphe, dăh mă tơ̆ rim bro mir pơgar mă kon pơlei tơroi đei đe tơtông klĕ ‘noh iung năm hloi. Hơnăp jang kơ kŏng ang ‘nŏh tơm hloh păng oei đei hloi rim hơnih jang tơring nhen: Bơngai tang măt ăn dân quân tơring, đoàn hơdruh tơdăm, khul kon pơlei choh jang sa, ƀô̆ đô̆i so, măt trân păng pơđĭ kon pơlei đei mir pơgar chehphe vang iung jang dăr joang vei lăng năng tông chehphe ăn kon pơlei.”

Pơyan jang sa 2023 – 2024, lơ̆m dêh char Dak Lăk đei vă jê̆ 213.000 ha chehphe, phĕ iŏk đei jô̆ hơtŏ đơ̆ng 2 tân 6 truh 2 tân 8 tă lơ̆m 1 hektar, akŏp iŏk đei đĭ đăng dang 550.000 tân, chă phĕ hơnơ̆ng truh tŏk bŏk khei 1 sơnăm 2024. Lơ̆m khei năr au gô đei pơhlom năng 200.000 ‘nu bơngai jang đơ̆ng rim dêh char găh Tu, tơring Tŏk bok... năm tơ̆ Dak Lăk jang phĕ chehphe ăn kon pơlei. Kơ yuơ măt bơngai năm jang lơ, akŏm lơ̆m khei ‘năr kơđeh, dôm tơdrong au to đei ƀôh ưh gan sơđơ̆ng.  

Thượng tá Phan Thanh Cường-Kơdră Hơnih jang Hình sự Kŏng ang dêh char Dak Lăk tơbăt, jang kiơ̆ nơ̆r pơrô̆ jang đơ̆ng Kŏng ang dêh char Dak Lăk găh tang găn hơlau rim tơdrong pơm glăi phă pơrăm dăh mă tơttông klĕ phĕ klĕnh chehphe pơyan chehphe đum sơnăm au, hơnih au hlôi pơchoh trong ăn kŏng ang dêh char tơlĕch hrơ̆p mĭnh ‘măng rim trong jang nhen: Iung jang hơdoi hăm Kŏng ang rim apŭng, thĭ xah, pơlei tơm vei lăng năng tông ‘lơ̆ng dôm bơngai đei jau pơm tơdrong glăi au to tơ̆ tơring, ưh kơ lê̆ đei tơdrong pơm yoch au to; athei bơngai tang măt rim hơnih răt iŏk tơmam drăm choh jang sa lơ̆m dêh char ưh kơ răt iŏk chehphe kơsĕ, chehphe đe tơtông klĕ chă tĕch; pơrô̆ pơrôp kon pơlei atŏk kơtang jơhngơ̆m đon kơchăng, hơdrin vang iung tơjră phă pơrăm dôm bơngai pơm yoch vă tang găn hơlau đơ̆ng hơtăih, iung jang hơdoi hăm rim hơnih bơ̆ jang tơring pơgơ̆r năm pơtrui dăr joang vei lăng năng tông mŭk drăm Kon pơlei… Thượng tá Phan Thanh Cường tơbăt mĭnh ƀar tơdrong jang tơm kơ hơnih au lơ̆m tơchă rôp dôm bơngai pơm yoch, pơm glăi lơ̆m pơyan phĕ chehphe sơnăm 2023 – 2024. “Hơnih bơ̆ jang Kanh sat Hinh sư̆ hlôi pơjing trong iung jang vă akŏm dăr lăng đĭ đăng ŭnh hnam jang đơ̆ng tơring anai năm jang vă vei lăng năng tông ‘lơ̆ng hơ iă, ưh kơ lê̆ đe đei pơm tơdrong yoch hăm khôi luơ̆t, tơtông klĕ mŭk drăm dăh mă phă pơrăm mŭk drăm. Đơ̆ng noh pơm sơđơ̆ng dơ̆ng kơjăp tơring, vă kon pơlei sơđơ̆ng jơhngơ̆m jang sa phĕ chehphe lơ̆m pơyan phĕ 2023 – 2024 au”.