Sơnăm hŏk 2023-2024, Hnam trưng hŏk jăl 1, jăl 2 Lê Duẩn, xăh Ea Puk, apŭng Krông Năng đei 710 ‘nu hŏk tro tơ̆ 2 jăl hŏk. Lăp đơ̆ng tŏk bŏk khei 8, hnam trưng hlôi jang đang tơdrong jang rơih hŏk tro, pơhrăm ming tơdrong joăt jang ăn thây kô pơtho tơ̆ đĭ đăng dôm grŭp lăm, mă loi ‘noh thây kô pơtho tơ̆ lăm 4 păng lăm 8 kiơ̆ tơdrong jang pơtho pơhrăm phổ thông 2018. Hơdai hăm ‘noh, răt tơmam pơtho hŏk, pơgơ̆r hơpuih hơmet cham, lăm hŏk, pơm hơnih lăng rơgoh, ‘yâu, ‘lơ̆ng ăn sơnăm hŏk ‘nao. Ƀok Nguyễn Duy Nghĩa, Kơdră vei lăng hnam trưng tơbăt:

“Hnam trưng hlôi hơmet ming anih jang tơmam, hnam chă pơyơ̆ng, hơmet rơgoh, tơplih kơ ƀŏng ŭnh điên păng răt tơmam pơyua ăn tơdrong jang pơtho pơhrăm phổ thông ‘nao lăm 4 păng lăm 8. Oei tơdrong pơtho hŏk lăm 5 păng lăm 9 oei hŏk hla ar so tơmam đơ̆ng hnam trưng oei tôm tĕch”.

Hơdai hăm tơdrong hơmet ming, pơm ming 1,2 tơdrong jang iĕ, lơ tơring lơ̆m dêh char hlôi bơngơ̆t truh hơmet ăn kon jên dôm jĭt ti hlak jên ăn dôm hnam trưng man ‘nao lăm hŏk, hnam ăn thây kô, hŏk tro hŏk pơhrăm, hơnih cham hnam trưng kiơ̆ trong pơm kơ jăp ‘lơ̆ng. Ƀôh hơdăh, tơ̆ apŭng Cư Mgar, sơnăm hŏk âu, apŭng hlôi hơmet ăn jên hloh 33 ti 500 triệu hlak jên vă tơmơ̆t jên jang pơm anih jang păng răt tơmơ̆t dơ̆ng bơ̆n tơmam pơtho hŏk ăn kơ dôm hnam trưng hŏk. Truh dang ei, tơmam tơ̆ dôm hnam trưng hlôi pơm lăp hăm ‘meh vă tơdrong jang pơtho pơhrăm ‘nao. Ƀok Nguyễn Tự Do, Kơdră Anih vei lăng găh pơtho pơhrăm apŭng Cư M’gar tơroi:

 “Anih vei lăng pơtho pơhrăm apŭng Cư Mgar hlôi athei dôm hnam trưng vang tơgŭm ăn khŭl kơdră tơring, Anih vei lăng kon pơlei apŭng hơnơ̆ng tơmơ̆t dơ̆ng hơmet ming anih jang, răt tơmam drăm pơyua ăn tơdrong jang pơtho păng hŏk, tơmơ̆t dơ̆ng ăn thây kô pơtho vei sơđơ̆ng kơ sô̆ hơgăt kiơ̆ tơchơ̆t đơ̆ng Anih tơm vei lăng găh pơtho pơhrăm vă bơ̆jang tơdrong jang pơtho pơhrăm phổ thông 2018 păng Tơdrong jang pơtho pơhrăm phổ thông tơlĕch ăn, vei sơđơ̆ng ăn dôm hnam trưng yak mơ̆t lơ̆m sơnăm hŏk ‘nao ‘lơ̆ng”.

Sơnăm hŏk 2023-2024, dêh char Dak Lak đei hloh 1.000 anih pơtho pơhrăm đơ̆ng Mầm non truh jăl 3. Hơdrol kơ sơnăm hŏk ‘nao, dêh char Dak Lak hlôi athei Anih vei lăng pơtho pơhrăm tơdrong jang joăt jang ăn khŭl thây kô pơtho, pơm hơtŏ thây kô pơtho đơ̆ng anih pơtho rơkăh ăn anih ưh kơ măh. Hơvơn rim kon jên vă hơmet ăn găh anih jang, tơmam pơyua ăn pơtho păng hŏk ăn kơ dôm anih pơtho pơhrăm pơm lăp hăm ‘meh vă Tơdrong jang pơtho pơhrăm phổ thông 2018. Sơnăm hŏk ‘nâu, lơ̆m anih jang đei tơmơ̆t jên jang hloh 965 ti hlak jên man ‘nao, hơmet ming, răt tơmam pơtho hŏk. Yă Lê Thị Kim Oanh, Phŏ Kơdră Anih vei lăng găh tơdrong jang pơtho pơhrăm dêh char Dak Lak tơbăt:

“Găh tơdrong ‘lơ̆ng hăm dôm hnam trưng kơ Anih vei lăng pơtto pơhrăm truh dang ei hlôi pơm lăp đei dôm tơdrong ‘meh vă găh anih jang kŭm nhen tơmam kơmăy kơmŏk vă gơh tơlĕch jang pơtho hŏk ‘lơ̆ng hloh ‘noh jĭ lơ̆m jăl jang tơlĕch tơdrong jang pơtho pơhrăm 2018. ‘Ngoăih kơ ‘noh hăm dôm anih pơtho đơ̆ng mầm non, jăl 1, jăl 2 hlôi klăp song ăn kơ dôm apŭng mă lei anih jang kŭm athei dôm Anih vei lăng pơtho pơhrăm kơchăng lơ̆m tơdrong dăr hơlen lăng dơ̆ng dôm tơdrong hiôk găh anih jang tơmam vă kiơ̆ đơ̆ng noh tơroi tơbăt hăm Anih vei lăng kon pơlei apŭng vă jang tơgŭm hơmet ăn dôm kon jên vă vei sơđơ̆ng tơdrong hiôk pơgơ̆r pơtho hŏk ăn sơnăm hŏk ‘nao.”

Kŭm kiơ̆ tơroi tơbăt đơ̆ng Anih vei lăng găh pơtho pơhrăm Dak Lak sơnăm hŏk âu ki, lơ̆m dêh char đei dang 30 rơbâu ‘nu hŏk tro tốt nghiệp jăl 2. Lơ̆m noh, hloh 23.100 oh gơh hŏk lơ̆m 10 THPT, hloh 4.000 oh mơ̆t hŏk lơ̆m dôm anih pơtho pơhrăm hơnơ̆ng - pơtho pơhrăm tơdrong jang. Kơ sô̆ uơ oei dơ̆ng hloh 2.400 oh dang ei oei tam mă đei hnam trưng vă hŏk. Vă hơmet pơ ‘lơ̆ng tơdrong ‘nâu, Anih vei lăng kon pơlei dêh char Dak Lak athei Anih vei lăng găh tơdrong jang pơtho pơhrăm hơnơ̆ng dăr hơlen tơdrong hơgăt rơih hŏk tro hŏk tơ̆ dôm trưng trung học phổ thông rơih tôm kơ sô̆ kiơ̆ ‘meh vă. Hơdai hăm, dăr hơlen ƀlep kơ sô̆ hŏk tro ưh kơ măh hnam trưng lăm hŏk tơ̆ rim tơring vă hơmet ăn dôm đe oh mơ̆t hŏk tơ̆ dôm trưng pơtho pơhrăm hơnơ̆ng. Dôm tơring tơgŭm hơdrol hơmet ăn tơmơ̆t dơ̆ng kon jên tơtĕnh vei sơđơ̆ng anih jang, tơmam, pơm hla ar jang hơdai hăm thây kô pơtho ăn kơ dôm hnam trưng pơtho pơhrăm hơnơ̆ng, pơtho pơhrăm tơdrong jang vă pơm lăp hăm ‘meh vă hŏk pơhrăm đơ̆ng đe oh.