Tơdrong tơm Pơm lêh hop akŏm tơlĕch ăn lơ̆m 5 sơnăm au kơnh ‘nŏh atŏk hŏk gơ̆h nơ̆r Anh păng tơdrong hlôh vao vang mơ̆t hơdoi apŭng plĕnh teh ăn sinh viên; Yak hơdoi, tơgŭm djru păng atŏk tơ iung sinh viên kon kông tơ̆ tơring. Hrei au Đăk Lăk đei hloh 14.400 ‘nu sinh viên, hŏk pơhrăm tơ̆ 12 hnam trương Đăi hŏk, kao đăng. Lơ̆m au, đei vă jê̆ 3.000 ‘nu sinh viên kon kông.

Lơ̆m 5 sơnăm au ki, tơdrong jang sinh viên păng tơdrong bơ̆ jang kơ Khul sinh viên Việt Nam dêh char Đak Lăk hlôi đei hơyak atŏk tơ iung ‘nao hăm lơ tơdrong jang ‘lơ̆ng hơ iă, hơvơn đei lơ hơdruh tơdăm, sinh viên vang iung jang. Lơ tơdrong jang tơlĕch jang ‘lơ̆ng hơ iă kơ yuơ kon pơlei pơla nhen: ‘Măng iung jang Pơyan Khei pơyan ‘lơ̆ng rŏ, Vang tơgŭm pơyan pơlong. Rim ‘măng hơvơn “Tơ iung pơjing tơdrong kăl um rup hơdruh tơdăm Đăk Lăk chăl hle”, “Mĭnh năr đei mĭnh tơdrong kơtơ̆ng ang ‘lơ̆ng, mĭnh giĕng mĭnh tơdrong ‘lơ̆ng” đei sinh viên iung jang kiơ̆ kơtang. Hloh 3.000 ‘nu sinh viên hơdrin yak hloh tơnap tap hŏk pơhrăm hơgei hlôi iŏk đei kon jên hŏk pơhrăm kơjă kơjên 3 ti hlak jên.