Pơyan pơdơh hŏk sơnăm 2023 âu ‘măng pơ dơh tôch kơ ƀlŏk hăm oh Huỳnh Tấn Đạt, lăm 5, Hnam trưng hŏk jăl 1 Lê Hồng Phong, apŭng M’Đrắk, ƀơ̆t đei mĕ ƀă ăn vang akŏm ‘măng vă kơ băt pơm kanh sat tang găn ŭnh sa pĭnh ŭnh sa tơ̆ Anih pơ gơ̆r kanh sat tang găn ŭnh sa pĭt ŭnh sa păng dŏng sar bar dŏng tơgŭm Kŏng an dêh char Dak Lak. Lơ̆m ‘măng vang akŏm vă kơ băt âu, Đạt đei tŏk tơ̆ gre pĭt ŭnh sa, dui đing pĭt ŭnh sa hơdai hăm đe khŭl linh tang găn ŭnh sa pĭt ŭnh sa păng pơm kiơ̆ dôm tơdrong gơh pruih đak pĭt ŭnh; lĕch đơ̆ng hơnih krê hơmơt mưh đei ƀôh ŭnh sa. “Vang hŏk lăm pơtho tơdrong gơh băt, oh hlôi hŏk đei trong kơ dâu lĕch đơ̆ng ŭnh sa, păng hŏk đei lơ tơdrong hơiă dơ̆ng.”

Kŭm vang hŏk lăm vă kơ băt pơm kanh sat tang găn ŭnh sa pĭt ŭnh sa, oh Nguyễn Ngọc Quỳnh Anh, hŏk tro lăm 5 Hnam trưng hŏk jăl 1  Hoàng Việt, pơlei tơm Buôn Ma Thuột, tơ roi: “Năr ‘nâu ‘noh năr mă blŭng kon đei chĕp đing pruih đak vă pĭt ŭnh sa. Kiơ̆ đơ̆ng vă kơ băt âu, kon tôch kơ ‘meh tơdrong jang đơ̆ng đe ma lĭnh dŏng pĭt ŭnh sa.”

Hơdai hăm dôm lăm pơtho tơdrong hlôh vao, joh ayŏ pơ yan pơdơh hŏk, dăh mă vă hơioh chă pơ ngôi kơ dih tơ̆ hnam, 2,3 sơnăm kơ âu, dôm ŭnh hnam păng hnam trưng hŏk tơ̆ Dak Lak hlôi bơngơ̆t truh tơdrong ăn hơioh vang hŏk dôm lăm hŏk tơ̆ ‘ngoăih nhen chă hơlen lăng cham char bri brăh, jơhnơr arih; vă kơ băt jang chŭn mir; dôm lăm pơ tho glơi, byoh, teh sŏk iĕr, hŏk pơm lĭnh; lĭnh đak dơ sĭ, lĭnh dŏng pĭt ŭnh sa; kơ trăi hè nơ̆r Anh; đă ƀŏng lŏng... ‘Nhŏng Nguyễn Văn Hiển, oei tơ̆ phường Tân Lập, pơlei tơm Buôn Ma Thuột, akhan dôm tơdrong vă kơ băt nhen thoi ‘nâu gô tơgŭm đe kon tôch kơ lơ: “‘Meh vă đơ̆ng ŭnh hnam ‘noh jĭ vă đe mon đei cham pơ ngôi đei yua ‘lơ̆ng, mă 2 ‘noh jĭ ăn đe mon gơh băt păng chĕp răk đei tơdrong hlôh vao yan âu. Dôm tơdrong gơh băt yan âu gô yak hơdai hăm đe kon lơ̆m tơdrong arih sa. ‘Nâu tơpă jing tơdrong đei yua, tơgŭm hơioh đei băt păng hơtŏk tơiung tôm tơdrong hloh.”

Dêh char Dak Lak dang ei đei dang 508.000 ‘nu hơioh, ‘meh vă vang hŏk dôm lăm gơh băt lơ̆m ‘măng pơ dơh hŏk ‘noh tôch kơ lơ. Yă Nguyễn Thị Thúy Hiền, phŏ Kơdră vei lăng Anih joh ayŏ hơdruh tơdăm păh iung Dak Lak (găh Anih jang đoàn dêh char Dak Lak) tơbăt, roi ‘năr roi đei lơ mĕ ƀă chih măt ăn kon oh vang hŏk dôm lăm gơh băt arih, joh ayŏ kơ dŏ soang, tơplŏng kơ dâu; vă kơ băt pơm ƀô̆ đô̆i; lĭnh dŏng pĭt ŭnh sa, linh đak dơ sĭ. Pơm lăp hăm ‘meh vă ‘noh, pơ yan pơdơh hŏk sơnăm 2023 âu, anih jang hlôi pơgơ̆r hloh 100 lăm hŏk dôm kơ loăi păng hlôi sơng đei vă jê̆ 5.000 ‘nu hơioh tơ̆ pơlei tơm Buôn Ma Thuột, dôm apŭng tơ jê̆ nhen Buôn Đôn, Cư M’gar, Krông Pach…   Kiơ̆ kơ yă Hiền, đơ̆ng dang ei truh đĭ pơyan pơdơh hŏk, gô đei dơ̆ng lơ tơdrong jang đei yua ‘măn kơ đe hơioh tơ̆ dôm apŭng lơ̆m dêh char: “Hơmet ăn dôm tơdrong jang pơyan pơdơh hŏk sơnăm 2023, Anih jang Đoàn dêh char hlôi tơlĕch lơ tơdrong jang pơyan pơdơh hŏk ăn kơ dôm anih jang đoàn apŭng, thĭ xăh,pơlei tơm vă pơ gơ̆r dôm tơdrong jang lăm hŏk pơyan pơdơh hŏk rơgoh ăn kơ đĭ đăng đe hơioh lơ̆m dêh char Dak Lak. Kiơ̆ hơlen lăng đơ̆ng nhôn păng hlôi ƀôh, lơ anih jang hlôi pơ gơ̆r dôm lăm hŏk, tơdrong jang pơyan pơdơh hŏk ăn kơ đe oh vang hŏk vă kơbăt tôch kơ lăp hăm bơngai ‘lơ̆p ‘lŏ păng ‘meh vă đơ̆ng đe oh, hăm tơdrong yan âu tơ̆ rim tơring. Mă hơdăh, dôm anih jang đoàn apŭng Krông Ana, Krông Pach dăh mă thị xã Buôn Hồ hlôi pơgơ̆r dôm tơdrong jang hơdăh ‘lơ̆ng ăn kơ đe oh hŏk glơi đĕch, hŏk joh ayŏ kơ dŏ soang, pơgơ̆r dôm tơdrong jang ngôi pơ chơt ‘ngoăih kơ lăm hŏk ăn kơ đe oh...”.