Hyum ‘nhĕt tăh lơ̆m hơdrong rơmo, ‘nhŏng Y Hen Niê, oei tơ̆ plei Yông B, xăh Ea Drơng, apŭng Cư Mgar chhôk hơiă tơroi, ‘nâu jĭ tơdrong jang tơgŭm ăn ŭnh hnam sư klăih đơ̆ng dơnuh hin lơ̆m hơtuch sơnăm sơ̆.  Đơ̆ng 7 sơnăm hơdrol, ŭnh hnam sư đei apŭng tơgŭm  40 triệu hlak jên vă man hnam tơgoăt tơgoăl. Mĭnh sơnăm đơ̆ng rŏng ‘noh, Anih jang Mặt trận tổ quốc xăh hơnơ̆ng tơgŭm jên răt 1 pôm rơ mo yŏng. Đơ̆ng noh 6 sơnăm âu ki, ŭnh hnam sư vei rong jing đei 5 tŏ rơmo, tĕch dai rơmo kon, tơgĕch iŏk ĭch rơmo săy ăn pơ gar cheh phe. Klo kăn sư kŭm pơtho băl bơngơ̆t jang sa, rong kon hơ ‘lơ̆p vă sơđơ̆ng tơdrong arih sa.

“Hơdrol sơ̆ mơmat tat, dơnuh hin, đei tơdrong bơngơ̆t truh đơ̆ng teh đak, asong kon tơrong nhen bơ̆n nhŭng, rơ mo, tơgŭm ming man hnam oei. Hăm tơdrong bơngơ̆t truh ‘noh ŭnh hnam klo kăn, kon hơ ‘lơ̆p sa roi pơ năm jang sa, hơdrin yak hloh. Klo kăn nhi kŭm hơdrin hơmet ‘lơ̆ng iŏk yua, jang thim tơ̆ ‘ngoăih vă hơtŏk tơiung mŭk drăm păng tơdrong arih sa ‘lơ̆ng ƀiơ̆. Ĭnh apĭnh bơ nê đe kơdră chĕp kơ̆l hlôi bơngơ̆t truh.”

Kŭm klăih đơ̆ng dơnuh hin đơ̆ng hơtuch sơnăm sơ̆, ŭnh hnam mŏ H Blip Niê oei tơ̆ plei Yông hlôi tơmơ̆t jên jang răt dơ̆ng 7 sao teh mir pơtăm cheh phe vă hơmet ming iŏk yua. Mŏ H Blip tơroi, đei đăi tơdrong tơplih ‘noh gơnang đơ̆ng đei Mặt trận tổ quốc xăh tơgŭm 3 tŏ pơ be yŏng đơ̆ng hơtuch sơnăm 2017.

 Ŭnh hnam nhôn hơdrol sơ̆ mơmat tat dêh, ưh kơ đei teh choh jang sa tôch kơ dơnuh hin. Đei teh đak tơgŭm pơ be yŏng ‘noh ĭnh kŭm hơdrin vei lăng ăn pơ be tuh vă ƀrư̆ ƀrư̆ dă ƀiơ̆ kơ mơmta tat, iŏk jên chă pơ đom đang kơ ‘noh tŏk iŏk mơng dơ̆ng vă răt teh mir, pơ tăm cheh phe păng ƀrư̆ ƀrư̆ pơih să choh jang sa vă yak hloh klăih đơ̆ng dơnuh hin.

Tơdrong jang ‘mơ ‘met rong nhŭng teh kŭm đei lang să jơ̆p lơ̆m apŭng Cư Mgar hăm tơdrong jang kiơ̆ đơ̆ng kang ƀô̆, đảng viên păng kon pơlei. Đei pơih să tơ̆ dôm khŭl jang, grŭp tơpôl. Yă H Núi Niê, Phŏ Kơdră Jơnŭm vei lăng drŏ kăn apŭng Cư Mgar tơbăt, jơnŭm vei lăng drŏ kăn kŭm tơlĕch jang tơdrong jang rong nhŭng teh hăm kơ sô̆ ‘mơ ‘met đơ̆ng 1.000 hlak jên truh 20 rơbâu hlak jên 1 khei, đei mŏ oh jang kiơ̆ tơnăp.

Lơ̆m dôm sơnăm âu ki ‘noh tơlĕch jang 1 chi hội đei tŏ sĕt hloh 1 trong jang ‘mơ ‘met, lơ̆m noh đei trong jang “Rong nhŭng teh” ‘noh jĭ hơdăh hloh. Kiơ̆ đơ̆ng tơdrong jang ‘nâu ‘noh kŭm lang să đei tôch kơ lơ tơdrong jang, lơ̆m noh đei dang 60% mŏ oh ‘noh bơngai kon kông jang kiơ̆ tơdrong jang ‘nâu.

Hăm tơdrong bơngơ̆t truh jang kiơ̆ đơ̆ng pơ đĭ khŭl jang chĭnh trĭ, tơdrong jang ‘mơ ‘met rong nhŭnh teh hlôi jing tơdrong jang đei lang să jơ̆p lơ̆m apŭng Cư Mgar, pơm đei jên jang tŏk truh kơ ti hlak jên vă tơlĕch jang tơgŭm dôm ŭnh hnam dơnuh hin, vă jê̆ dơnuh hin lơ̆m apŭng păng ŭnh hnam đei tơdrong arih sa mơmat tat. Gơnang đơ̆ng noh, truh dang ei, kơ sô̆ ŭnh hnam dơnuh hin lơ̆m apŭng hlôi tơjur lơ, oei dang 4,4%, ŭnh hnam vă jê̆ dơnuh hin oei dang 7,5%, iŏk yua jô̆ păh lăp kơ̆l bơngai đei hloh 59 triệu hlak jên 1 ‘nu 1 sơnăm. Tơdrong arih sa kon pơlei roi ‘năr roi đei tơplih ‘lơ̆ng. Ƀok Y Wem Hwing, Phŏ kơdră Anih vei lăng kon pơlei apŭng Cư Mgar tơbăt:

Tơdrong vei lăng tơdrong arih sa tơmam drăm păng jơhngơ̆m đon ăn tơpôl dôm hơdrĕch hơdrŭng lơ̆m apŭng Cư Mgar ‘noh apŭng ling lang bơngơ̆t truh păng tơlĕch ‘noh jĭ 1 lơ̆m dôm hơnăp jang hơdrol vă đơ̆ng noh vei lăng tơdrong arih sa, tơmam drăm, jơhngơ̆m đon kơ kon pơlei, mă kăl ‘noh jĭ dôm ŭnh hnam dơnuh hin, ŭnh hnam teh đak tơgŭm păng dôm ŭnh hnam mơ mat tat, kiơ̆ tơdrong jang pơgơ̆r ‘noh jĭ ưh kơ lê̆ bu đei hŭt lê̆ tơ̆ rŏng. Jang ‘lơ̆ng tơdrong jang tơroi tơbăt trong jang tơgŭm đơ̆ng Đảng, trong jang tơgŭm khôi luơ̆t  đơ̆ng teh đak ăn kon pơlei. Chông ba, tơƀôh trong jang, trong năm păng bơ̆ jang ƀlep vă tơgop pơm kon pơlei ‘lơ̆ng lơ̆m tơpôl.

Trong jang ƀônh ƀŏ, mĭnh ŭnh hnam lăp kăl ‘mơ ‘met đơ̆ng 1.000 hlak jên 1 khei mă lei dôm jơ nei hơnhăk ăn ‘noh jĭ tơdrong ‘lơ̆ng vă tơgŭm ăn dôm tơdrong jang vei lăng sơđơ̆ng tơdrong arih sa tơpôl hơdăh ‘lơ̆ng. Tơdrong jang rong nhŭng teh tơ̆ apŭng Cư Mgar hlôi tơgop sơđơ̆ng tơdrong arih sa lơ ŭnh hnam tơ̆ tơ ring, mă loi ‘noh jĭ bơngai kon kông găh ŭnh hnam dơnuh hin, vă jê̆ dơnuh hin păng đei tơdrong arih sa mơmat tat dêh hloh. Gơnang đơ̆ng noh, đe sư sa roi lui ngeh dơ̆ng lơ̆m tơdrong jang tơgŭm đơ̆ng Đảng, bơngơ̆t jang sa, yak hloh klăih đơ̆ng dơnuh hin, tơgop hơtŏk tơiung mŭk drăm tơ̆ tơring.