Mă hơdăh tơ̆ trong Hồ Chí Minh jăl trong kơdâu klĕch phường Quảng Thành, plt Gia Nghĩa, găh jơnglăng păih thong, tĕh hlŭn hlŏh 3m. Tĕh hlŭn tor kơjung, xă, pơjoă truh tơ̆ dang 100 unh hnam kon pơlei. Tơ̆ tơring sơlam xăh Quảng Trực, apŭng Tuy Đức, đei anih hơđăh, tĕh hlŭn roi xă, păng đei dơ̆ng 1 anih tĕh hơđăh ‘nao, kơjung dang 80m. 

Khul kơdră tơring hlôi pôk rĭ 66 unh hnam tơ̆ dôm plei Bu Krắk, Bu Prăng, chĕng găn tơring, pơm anih gak ưh ăn kon pơlei mât lơ̆m tơring hơmơt. Krê hlŏh jĭ tơ̆ dơnâu mong đak Đắk N’ting, xăh Quảng Sơn, apŭng Đắk Glong, bơnơ̆ dơnâu đak đei ƀôh lơ anih tĕh, ƀê tông hơđăh găh tu păng găh pơbăh, tôch hơmơt dơnâu mong đak Đắk N’ting pơchăh.

Đơ̆ng rŏng kơ truh dăr lăng tơ̆ dôm anih đei tĕh hlŭn tơdrŭt vă hơlih, lơ̆m hop akŏm ‘năr 5/8, Kơdră vei lăng kon pơlei dêh char Dak Nông athei dôm anih jang kơpal, tơring tơrang akŏm jơhngâm hơlen năng, tơtom pôk rĭ hnam kon pơlei lĕch đơ̆ng tơring krê hơmơt. Anih vei lăng trong nơnăm Đắk Nông păng khul kơdră pơgơ̆r plt Gia Nghĩa pơm var găn, hơtâp kơƀang chih tơbăt tơring hơmơt kơ tĕh hơlih, roi tơbăt ăn gre lê̆ gan kơdâu kiơ̆ trong ver Gia Nghĩa (trong tơƀưh Trong gre 14 hăm trong gre 28).