Kơtă ah khei 1/2024, Anih jang vei lăng kon pơlei dêh char Đăk Nông hlôi đei Tơchơ̆t kơsô̆ 54 kĭ pơkăp 17 tơdrong vă jang hơvơn asong jang hăm kơsô̆ jên hloh 3.000 tih hlj, adoi lơ̆m dôm tơdrong jang kăp gĭt pran kơ Đăk Nông. Anih jang vei lăng kon pơlei dêh char Đăk Nông hlôi pơgơ̆r dôm anih jang, dôm tơring pơtoi hơlen păng keh đang hla bar kăl, vă hơvơn asong jang 44 tơdrong vă jang lơ̆m jăl jang pơtoi, hăm kơsô̆ jên asong jang hloh 290 rơbâu tih hlj, mă lơ noh gah tơdrong jang kŏng ngĭp, nhen sir kôch pai bôxít - alumin -  nhôm, hơtŏk pơ-‘lơ̆ng unh hơyuh...

Dêh char adoi akŏm khul kơpal nă hơlen tơdrong asong jang tơ̆ lơ tơring lơ̆m jơ̆p teh đak adoi nhen minh ƀar teh đak nhen Ấn Độ, Trung Quốc, Hàn Quốc, Nhật Bản… Anih jang vei lăng kon pơlei dêh char Đăk Nông akŏm Khul kơpal kăp gĭt vă dah tom pơgơ̆r sek tơlang dôm tơdrong tơnap tap, tơhlăk tăk kơ anih jang mŭk drăm, anih asong jang.