Pơm kiơ̆ tơdrong kla jên vang jang tơjră pơrang jĭ kiơ̆ Tơchơ̆t kơsô̆ 16 xơnăm 2021 đơ̆ng Jơnŭm pơgơ̆r teh đak, đơ̆ng rŏng kơ lơ 'măng kla, truh khei năr âu dêh char Đăk Nông adoi oei “hre” kơ đe kang ƀô̆ jang pơgang hăm kơsô̆ jên hloh 32 tih hlj. Tơroi găh tơdrong mă âu, ƀok Huỳnh Thanh Huynh, Phŏ Kơdră Anih jang găh pơgang hơmet jĭ jăn dêh char  Đăk Nông ăn tơbăt: "Anih jang pơgang hơmet jĭ jăn hlôi jang hadoi hăm anih jang găh jên hu tơgŭm ăn Anih vei lăng kon pơlei dêh char vă đei trong pơklaih, noh dang ei hlôi đei Anih jang vei lăng kon pơlei dêh char tơchơ̆t axong jên mong kơ xơnăm 2023, lơ̆m noh axong jên kla sa hơpăh ăn 'nhŏng oh lơ̆m dôm xơnăm 2020, 2021 păng 2022 noh hloh 32 tih hlj".

Tơ̆ hop akŏm găh hla bar tơroi 'nao âu, yă Tôn Thị Ngọc Hạnh, Phŏ Kơdră Anih jang vei lăng kon pơlei dêh char Đăk Nông tơroi, đei lơ tơdrong pơm ăn dêh char jang adar tơdrong kla jên sa hơpăh ăn kang ƀô̆ jang pơgang vang tơjră pơrang jĭ covid-19. Minh păh noh kơlih dêh char oei lơ tơnap tap, axong jên jang tam mă tơnăp, minh păh noh pơm kiơ̆ kơhret trŏ nhen tơchơ̆t đơ̆ng khôi luơ̆t teh đak. Dang ei dôm tơdrong tơhlăk âu hlôi đei pơklaih 'lơ̆ng:  "Lơ̆m dôm năr âu ki, nhôn athei pơgơ̆r jang hăt hot hăm Anih jang pơgang hơmet jĭ jăn, Anih jang jên hu vă xek tơlang keh đang tôm tơdrong tơchơ̆t ăn anih jang pơgang hơmet jĭ jăn, mă lei athei vei trŏ nhen tơchơ̆t, ưh lê̆ đei tơdrong glăi, noh đei tơdrong adar thoi âu. Dang ei tơdrong âu hlôi đei hơmet kla tôm, yơ̆ng âu ki nhôn adoi chơ chă dôm tơdrong tơgŭm, athei gô jên axong jang ăh xơnăm 2022 rơkăh păng nhôn athei kăt lê̆ lơ tơdrong jang nai vă akŏm xek axong jên ăn anih jang pơgang hơmet jĭ jăn. Jăh vă akhan dêh char tơrĕk tơgŭm tơnăp, mă lei kơlih ưh kơ kĕ yuơ dêh char hin dơnuh, jên jang ưh đei noh ƀơm lơ tơnap tap".

Giĕng âu ki (năr 3/6), 'Măng hop akŏm mă 20 đơ̆ng Jơnŭm pơgơ̆r jang kơ teh đak găh tang găn păng tơjră pơrang jĭ Covid-19 hlôi hop akŏm trư̆k twê̆n hăm dôm tơring. 'Măng hop akŏm âu pơma đam, xơkơ̆t hơdăh păng truh âu kơnh tơbang đĭ pơrang jĭ Coivd-19 tơ̆ Việt Nam. 'Nao âu, Thủ tướng teh đak bơ̆n Phạm Minh Chính pơgơ̆r Anih tơm jang Pơgang Hơmet jĭ jăn hơmet hla bar chih tơchơ̆t pơrang jĭ Covid-19 đơ̆ng pơrang jĭ tơpoh grŭp A jing grŭp B (dang đơ̆ng grŭp tôch hli hlơt găh tơpoh lang xă, kơsô̆ bơngai lôch lơ jing grŭp tơdrong jĭ tơpoh hli hlơt tơpoh tenh, lôch mưh ƀơm jĭ ăl) păng truh âu kơnh tơbang đĭ pơrang jĭ tơ̆ Việt Nam.

Atŭm hăm tơbang đĭ pơrang jĭ Covid-19, atŭm hăm 'Măng hop akŏm mă 5, Kuôk hô̆i jăl 15, rim bơngai tang măt adoi pơkăl pơm hơdăh tơdrong kla jên hăm dôm mŭk drăm 'noh kơmăi kơmŏk, tơmam drăm hăm mŭk drăm đei iŏk yua, tang găn tơdrong 'măn minh anih, đei trong jang tang găn huach kư̆ kă hăm tơmam đe chă tơgŭm păng kăp gĭt mă hlôi hơvơn đei. Bơngai tang măt Trần Văn Lâm, khul Bắc Giang, jang lơ̆m Anih jang Jên hu Jên mong kơ Kuôk hô̆i akhan, tơ̆ âu đei tơdrong tơm noh dôm mŭk drăm tam mă đei tôm hla bar tơchơ̆t tơmơ̆t vei lăng, iŏk yua nhen tơmam drăm atŭm: "Lơ̆m khei năr hơbuh pơrang noh đe 'nhăk truh tơgŭm kơmăi kơmŏk đĕch, ưh đei bu kơchĕng noh tơplih jing mŭk drăm atŭm thoi yơ? athei đei hla bar, kơjă xơkơ̆t hơdăh găh kih thuơ̆t thoi yơ. Tơdrong mă âu lơ̆m tơchơ̆t jên hu hlôi axong bơih, đei chih tơmơ̆t iŏk yua găh kơjă ưh kơxĭ athei chih ƀơ̆t tơmam drăm âu 'nhăk tĕch tơlĕch noh pơtơm xơkơ̆t hơdăh ôh. Lơ̆m kơplăh oei gô noh đe chih tơmam drăm 'nguaih kơ chih pơkăp, đơ̆ng rŏng kơ noh tơlĕch tơchơ̆t hơdăh”.

Rim bơngai tang măt ăn Kuôk hô̆i adoi akhan, kăp gĭt noh Việt Nam chih tơchơ̆t Covid-19 đơ̆ng pơrang jĭ tơpoh grŭp A jing grŭp B. Dang đơ̆ng grŭp tôch hli hlơt jing grŭp pơrang jĭ tơpoh hli hlơt păng đei lăng jing tơdrong jĭ chwên khua nai, hơmet păng kla jên adoi đei pơm kiơ̆ nhen dôm tơdrong jĭ chwên khua nai. Hơlen lăng pơtôm, bơngai tang măt Tạ Văn Hạ, khul Quảng Nam akhan, adoi tơroi tơbăt păng pơtoi kơchăng hăm dôm tơdrong tơplih yŏng 'nao: “Găh tơdrong jang khua hŏk anih jang pơgang hơmet jĭ jăn apŭng plenh teh hlôi tơbang bơih. Mă 2 noh tơdrong đei ƀôh tơpă tơ̆ Việt Nam noh tơdrong hơrih xa, pơm jang mŭk drăm tơpôl hrei âu adoi xơđơ̆ng bơih. Tơdrong hli hlơt đơ̆ng tơplih yŏng 'nao âu da ƀiơ̆ hloh, tenh hloh. Kiơ̆ kơ tơdrong noh vă bơ̆n gơh xơđơ̆ng tơbang đĭ pơrang, mă lei adoi tơbang hơdăh pơtoi kơchăng hăm tơdrong tơplih yŏng 'nao”.

Kiơ̆ 3 xơnăm tơjră pơrang jĭ ăn ƀôh, dôm tơdrong kơ-'nôh adrin đơ̆ng rim bơngai lơ̆m tơpôl, atŭm jơhngơ̆m tơjră pơrang jĭ adoi oei đei lơ tơdrong ƀôh hĕl kơ đon. 'Nâu jing ƀai hŏk kăp gĭt hơmet tôm găh anih jang, tơmam drăm, hla bar tơchơ̆t đơ̆ng khôi luơ̆t, tơlĕch pơtho kăp gĭt vă tơjră tơnăp hloh dôm pơrang jĭ nai mă chă hơbuh hli hlơt.