Hla ar chih tơroi tơ̆ hop akŏm ăn ƀôh, 6 khei âu ki, tơdrong jang tŏk mŭk drăm kơ Dak Nông đei 5,23%, tŏ sĕt ƀiơ̆ pơtêng hăm tơdrong hơgăt đei tơlĕch ‘nŏh 7,5%. Thu mong jên ăn tĕh đak lăp đei dang 1.550 ti, jur truh 20,5% pơtêng hăm khei âu sơnăm sơ̆.

Tơdrong tơlĕch jên jang kơ tĕh đak tơ̆ dêh char hiơ̆, tơdrong tơlĕch jang dôm tơdrong jang tơm kơ tĕh đak tơƀâp tơ tơhlăk tăk găh trong jang, tơdrong tơgŭm. Kơplăh ‘nŏh, tơdrong chĕng hơmet, tơlĕch trong iŏk yoa tĕh oei hiơ̆ hyĭn, tơdrong tơprŏh trong jang bô xít ƀơm truh tơdrong jang atŏk tơiung mŭk drăm, tơpôl tơ̆ tơring.

Pơma tơ̆ hop akŏm, ƀok Lưu Văn Trung, Kơdră Jơnŭm pơgơ̆r kon pơlei dêh char Dak Nông athei dôm bơngai tang măt Jơnŭm pơgơ̆r kon pơlei pơma nuh, pơm hơdăh kơlih yoa kiơ, mă loi jĭ yoa kiơ oei đei đon ưh kơchăng, jang ưh tơnăp kơna jing đei tơdrong ưh ‘lơ̆ng mưh tơlĕch jên jang kơ tĕh đak. Đơ̆ng noh tơlĕch trong hơmet pơ ‘lơ̆ng, tưk tơiung tơdrong jang mŭk drăm, tơpôl.