Ƀok Đoàn Minh Thuận, Phŏ Kơdră vei lăng kon pơlei xăh Quảng Trực, apŭng Tuy Đức, dêh char Dak Nông tơbăt, lơ̆m dang tŏk bŏk gơmăng ‘năr 31/7, tơ̆ plei Bu Krắc, xăh  Quảng Trực, đei ƀôh đôh re tih ưh kơ ê. Truh pơgê ‘năr 1/8, kon pơlei chă ƀôh lơ hơnih hơđang tơ̆ teh. Lăp đơ̆ng rŏng kơ iŏk đei kơ tơ̆ng ang, khŭl kơdră xăh Quảng Trực păng khŭl linh kơpal apŭng Tuy Đức hlôi năm truh tơ̆ hơnih âu hơlen lăng. Tơ̆ âu đei lơ hơnih hơ đang kơ jung dang 200m, să 10-15cm lơ̆m hơnih kon pơlei oei.

Lăp đơ̆ng rŏng kơ ‘noh, khŭl kơdră păng khŭl linh kơpal hlôi krao hơvơn, pôk rĭ kon pơlei kŭm hăm mŭk drăm lĕch đơ̆ng hơnih hơ đang truh tơ̆ hơnih sơđơ̆ng. Dang ei khŭl kơdră xăh Quảng Trực păng apŭng Tuy Đức tŏk bŏk tơlĕch jang khŭl linh păng dôm trong jang tang găn dôm tơdrong đei ƀôh ưh kơ ê.