Jĭ hơbuh covid-19 hlôi tang găn kĕ păng tŏk bŏk đei Hơnih chĕp pơgơ̆r teh đak găh tang găn jĭ hơbuh lăng hơlen tơchơ̆t đei jing dôm tơdrong jĭ jăn hmă, mă lei truh dang ei, tơ̆ dêh char Dak Nông oei tim mă jang keh đang kla ăn kon jên tơgŭm djru hăm rim kang ƀô̆ bơngai jang hơnih jang pơgang vang iung jang tang găn jĭ hơbuh.

Jang kiơ̆ tơdrong pơkăp tơgum djru tang găn jĭ hơbuh kiơ̆ Tơdrong tơchơ̆t kơsô̆ 16 sơnăm 2021 đơ̆ng Khul kơdră Teh đak, đơ̆ng rŏng lơ ‘măng kla ăn, truh dang ei dêh char Dak Nông oei “hre” ăn khul kang ƀô̆ ƀok thây pơgang hăm akŏp kon jên hloh 32 ti hlak jên. Tơ̆ hop akŏm tơroi tơbăt hăm khul chih kơtơ̆ng ang ‘nao au, yă Tôn Thị Ngọc Hạnh, Kơ iĕng Kơdră chĕp pơgơ̆r Hơnih vei lăng kon pơlei dêh char Dak Nông tơbăt, đei lơ tơdrong pơm ăn dêh char hiơ hiơ̆ kla ăn kon jên tơgŭm djru ăn rim kang ƀô̆ ƀok thây pơgang vang iung jang tang găn jĭ hơbuh Covid-19. Mĭnh păh kơ yuơ dêh char oei tơnap tap, tơnap mă pơ prŏ ăn kon jên, mĭnh păh kơ yuơ jang kiơ̆ kơjăp kiơ̆ ƀlep hăm tơdrong tơchơ̆t kơ khôi luơ̆t.