‘Nâu jĭ kơsô̆ chih jô̆ ‘nao đei Anih vei lăng kon pơlei dêh char Dak Nông roi tơbăt ăn Anih pơgơ̆r jang tang găn sar bar, tŏ ‘mi kial kơ nê̆ kơ tĕh đak. Đơ̆ng ‘năr 28/7 truh ‘năr 18/8, tơ̆ dêh char Dak Nông đei ‘mi tih đunh tơ̆ lơ tơring, pơm ăn đak lơ̆p lơ tơring kon pơlei oei xa păng tĕh hlŭn tơdrŭt tơ̆ 1,2 tơring. ‘Mi tih pơm ăn 2 ‘nu bơngai lôch yoa đak tơjrŏh hoch, lơ̆p 275 tŏ hnam, hlŏh 700ha ‘long pơtăm păng dang 230ha sơ lŭng rong ka hơdang. Kŭm hăm ‘nŏh, lơ anih jang, trong nơnăm păng dơnâu đak hư, hơđăh, vă hơlih tôch hơmơt. Akŏm đĭ đăng hiong răm tŏk truh 1.046 ti hlak jên.

Lơ̆m ‘măng ‘mi tih âu, Anih vei lăng kon pơlei dêh char Dak Nông đei 2 ‘măng roi tơbăt tơdrong krê hơmơt đơ̆ng sar bar. Tơdrong hơmet pơ ‘lơ̆ng hiong răm đơ̆ng ‘mi tih tơ̆ dêh char Dak Nông oei tơƀâp lơ pơmat tat. Dang ei, Anih mong jên tang găn sar bar kơ dêh char lăp oei đei pă 2,9 ti hlak jên đĕch. Oei jên ‘măn răk hiă đơ̆ng dêh char lơ̆m sơnăm 2023 ‘nŏh lăp hlŏh 74 ti đĕch. Yoa thoi nŏh, Anih vei lăng kon pơlei dêh char Dak Nông athei Anih pơgơ̆r jang kơ tĕh đak găh tang găn sar bar, tŏ ‘mi kial kơ nê̆ chih akŏm, roi tơbăt ăn Thủ tướng tĕh đak, tơlĕch trong tơgŭm jên đơ̆ng jên Trung ương ăn dêh char, hăm kơsô̆ jên 661 ti.