Ƀok Lê Đình Tuấn, Kơdră chĕp pơgơ̆r Hơnih bơ̆ jang vei lăng kon pơlei tơring Quảng Sơn, apŭng Dak Glong tơbăt, ‘mi tih đunh năr au ki pơm ăn dơnau pơnơ̆t đak Dak N’ting, găh tu thoong đak N’ting, găh lơ̆m pơlei N’ting đei teh tơdrŭt jơ̆ng pơnơ̆. Kơ yuơ lơ loh, kơdră tơring hlôi yông hăt hot 34 ŭnh hnam kon pơlei oei tơ̆ pơbăh thoong đak au lĕch veh đơ̆ng hơnih hli hlơt.

Kon pơlei oei tơjê̆ tơtăm tơ̆ hơnăp teh tơdrŭt, hơlih păng hơmơt pơm ăn truh hơlih pơchăh pơnơ̆t đak Dak N'ting 

Kiơ̆ đơ̆ng Hơnih vei lăng kon pơlei apŭng Dak Glong tơbăt, nak păh ‘ngiĕo pơnơ̆t đak tơ̆ pơlei N’ting đei ƀôh hơđang dang 500m, să đơ̆ng dang 10cm. Tơ-‘ngla tơmơ̆t jên jang hơnih au ‘nŏh Hơnih vei lăng rim tơdrong vă jang tơmơ̆t jên jang ming man dêh char Dak Nông hlôi pơtrŭh hla bơar tơbăt ăn Hơnih vei lăng kon pơlei dêh char Dak Nông, apĭnh hơvơ̆h hơnih bơ̆ jang hơlen hơdăh tơdrong tơm pơm ăn teh tơdrŭt hơđang au adoi đei trong vă vei lăng sơđơ̆ng tăp dăr tơdrong jang ming man au.