Năr 7/8, Khul bơ̆ jang kơ Hơnih pơrô̆ chĕp pơgơ̆r tang găn tŏ ‘mi kial pơrăm kơ yuơ Kơ iĕng Kơdră chĕp pơgơ̆r Hơnih tơm vei lăng Choh jang sa păng Atŏk tơ iung tơring tơrang Nguyễn Hoàng Hiệp, Kơ iĕng Kơdră Hơnih jang au pơm tơm hlôi năm dăr lăng tơdrong ‘mi kial hơbŭt hơbông, teh tơdrŭt hơlih tơ̆ dêh char Đak Nông. Khul athei dêh char Đak Nông kăl hrôih tơbăt hơdăh tơdrong hơmơt đơ̆ng ‘mi kial vă gơ̆h xek tơlang mĭnh ƀar tơdrong jang kăl.

‘Mi kial hơbŭt hơbông lơ̆m dôm năr au ki tơ̆ dêh char Đak Nông hlôi pơm ăn 2 ‘nu bơngai lôch, vă jê̆ 200 pơbŭng hnam păng hloh 650ha ‘long pơtăm đak lơ̆p, lơ trong nơnăm, pơnơ̆t đak hư răm kơtang, akŏp hiong răm hloh 250 ti hlak jên. Hloh đơ̆ng năm dăr lăng ‘mi kial hơbut hơbông adoi nhen dăr lăng tơ̆ mĭnh ƀar hơnih teh tơdrŭt hơlih păng pơnơ̆t đak tŏk bŏk hơđang tơdrŭt, hlŭn tơ̆ Đak Nông, Khul bơ̆ jang sơkơ̆t hơdăh tơdrong ‘mi kial hơbŭt hơbông pơrăm tơ̆ Đak Nông tôch kơtang, hơmơt tơt. Dêh char Đak Nông kăl hrôih tơbăt hơdăh tơdrong hơmơt đơ̆ng ‘mi kial vă đei trong xek tơlang, hơmet pơ ‘lơ̆ng lơ̆m jơ ‘năr kăl hăm dôm hơnih hư răm kơ yuơ đơ̆ng ‘mi kial pơrăm nhen pơnơ̆t đak, trong nơnăm. Kăl hơlen truh tơdrong hơmơt đei pơchăh pơnơ̆t đak, vă tơroi tơbăt tơtom.