‘Măng pơlong sơnăm ou, dêh char Dak Nông đei 21 hơnih pơlong, 344 lăm pơlong. Tơ̆ pơgê brei, đei 4 ‘nu hŏk tro gĭt kăl đei tơgŭm năm truh tơ̆ hơnih pơlong kơ yuơ đei sar bar trong nơnăm păng jĭ jăn. Lơ̆m ou, 3 ‘nu hŏk tro đei tơdrong sar bar trong nơnăm hơdrol năr pơlong jei oei tơ̆ apŭng Dak Mil.

Dôm hŏk tro ou đei khul kŏng ang kơ ‘mĭn năm truh tơ̆ hơnih pơlong. Mĭnh ‘nu hŏk tro tơ̆ hơnih pơlong kơ Hnam trương jăl pêng Hùng Vương, tơring Quảng Phú, apŭng Krông Nô jĭ pơchŭng hơdrol kơ năr pơlong đei ăn pơlong lơ̆m hơnih hơdrô̆ vă tang găn jĭ tơpoh. Pơgê brei, 7.577 hŏk tro tơ̆ Dak Nông vang pơlong môn Ngữ văn. Môn pơlong mă blŭng đei pơgơ̆r ‘lơ̆ng hơ iă. Ƀai pơlong môn Ngữ văn đei lơ hŏk tro tơroi akhan ưh kơ gan măh tơnap, gơ̆h pơm ƀai đei điêm lơ.