‘Nau jĭ ‘măng mă blŭng hop akom pơma dơnuh đei dêh char Dak Nông pơgơ̆r kiơ̆ trong hơpĭnh, tơl nơ̆r hơpĭnh. Tơ̆ hop akŏm, rim nơ̆r hơpĭnh, nơ̆r athei đei ƀơm truh rim tơdrong jang mŭk drăm, oei sa, tơpôl, vei lăng sơđơ̆ng teh đak, sơđơ̆ng tơring, tơ iung pơjing đảng păng khul jang chinh trĭ.

Lăp đơ̆ng rŏng mơ̆ng bơngai tang măt ăn kơdră chĕp pơgơ̆r rim hơnih bơ̆ jang tơblang ăn. Hơnih bơ̆ jang vei lăng kon pơlei dêh char, Jơnum vei lăng kon pơlei dêh char tơl hơdăh dôm nơ̆r hơpĭnh, dôm tơdrong đei pơma tơlĕch, ƀok Ngô Thanh Danh, Bí thư Đảng dêh char Dak Nông drơ̆ng akhan dôm nơ̆r tơgop hlôi tơbăt hơdăh jơhngơ̆m đon lăng ba, tơtăm đơ̆ng tơring. Mĭnh păh lơ̆m au hlôi đei rim hơnih bơ̆ jang dêh char tơblang hơdăh. Khul kơdră chĕp pơgơ̆r Đảng dêh char Dak Nông hơnơ̆ng chă tơchĕng hơlen, tơgoăt iŏk păng tơl hơdăh, xek tơlang dôm tơdrong hlôi đei pơma tơlĕch.