Ƀok Lê Quang Dần, Phŏ Kơdră Anih vei lăng choh jang xa păng atŏk tơiung tơring tơrang dêh char Dak Nông, tơroi, jô̆ truh dang ei, ‘măng ‘mi tih đunh năr tơ̆ dêh char đĭ pơm ăn 1 ‘nu bơngai lôch, 159 tŏ hnam đak lơ̆p, vă jê̆ 360ha ‘long pơtăm lơ kơloăi đak lơ̆p păng đang 150ha sơlŭng rong ka đơ̆ng kon pơlei đei đak tŏk blai bơnơ̆. ‘Mi tih oei pơm pơrăm lơ anih jang, trong nơnăm tơ̆ dêh char, mă loi ‘nŏh jĭ trong gre, dơnâu đak.

 Truh dang ei, tơ̆ dêh char Dak Nông đei 79 unh hnam kon pơlei athei tŏk oei tơ̆ tơring sơđơ̆ng yoa tĕh tơ̆ tơring đe sư oei xa đei đak lơ̆p, tĕh hơlih. Krê loi ‘nŏh jĭ tĕh hlŭn, tơdrŭt tơ̆ xăh sơlam Quảng Trực, apŭng Tuy Đức oei tôch hơmơt. Tơ̆ âu, khul kơdră pơgơ̆r tơring păng khul jang kơpal kơ apŭng Tuy Đức hlôi pôk rĭ 56 unh hnam kon pơlei tơ̆ 2 plei Bu Krăk păng Bu Prăng tŏk oei pơgia tơ̆ 1 hnam trưng. Dêh char Dak Nông pơtho ăn dôm anih jang kơpal vang chă hơlen năng yoa kiơ mă tĕh hlŭn tơdrŭt vă hơmet pơ ‘lơ̆ng.