Atŭm hăm pơlei tơm Gia Nghĩa, tơ̆ tôm 7 apŭng kơ dêh char Đăk Nông, dôm jăl jang, rim anih jang atŭm hăm lơ kon pơlei kon kông vang akŏm Têt pơtăm 'long xơnăm âu. Kơchĕng, lơ̆m 'măng âu, jâ̆p dêh char Đăk Nông gô pơtăm 163.000 tơm 'long jơk lơ kơluăi. Tơ̆ pơlei tơm Gia Nghĩa, pơgê năr 19/5, rim bơngai tang măt atŭm hăm lơ kon pơlei păng đoan viên, hơdruh tơdăm hlôi pơtăm 1.000 tơm hơngo tăp dăr um man Ƀlŏk tơbăt N’Trang Lơng. Tơ̆ lêh pơtơm, ƀok Lê Trọng Yên – Phŏ Kơdră Anih jang vei lăng kon pơlei dêh char Đăk Nông hơvơn dôm jăl jang, rim anih jang atŭm hăm kon pơlei kon kông lơ̆m dêh char kơchăng hloh lơ̆m vei lăng cham char, tơngăm hloh lơ̆m tơdrong pơtăm păng vei lăng tơm 'long jơk, vei lăng bri.