Sơnăm 2023, kơsô̆ unh hnam hin dơnuh tơ̆ dêh char Đak Nông tơjur 2,8%, lơ̆m noh, tơjur hin dơnuh hăm unh hnam kon kông tơ̆ tơring noh 8,1%. Hăm tơdrong đei jơnei âu, Đak Nông pơtoi chĕp kơ̆l Tây Nguyên gah tơjur hin dơnuh ah mă dêh char đei sơkơ̆t dơ̆ng mă 2 noh Đăk Lăk tơjur unh hnam hin dơnuh truh 1,5%. Ƀok Hồ Sỹ Hải, Kơdră Anih jang tơgŭm tơpôl, lơ̆m Anih Asong jang – Linh Jĭ rơka păng Tơpôl dêh char Đak Nông ăn tơbăt, đơ̆ng đei tơ-iung pơjing dêh char (sơnăm 2004) truh dang ei, dêh char hơnơ̆ng sơkơ̆t tơjur hin dơnuh jing sơnong jang dơnơm.

Dôm tơchơ̆t hơdrin păng lơ trong jang kơ dêh char hlôi pơyua kăp gĭt tơgăl kơ pôk bơnê lơ̆m 20 sơnăm kơ âu, Đak Nông jing minh lơ̆m 10 dêh char đei kơsô̆ unh hnam tơjur hin dơnuh tenh hloh kơ jâ̆p teh đak păng dơ̆ng hơlâu kơ tơring Tây Nguyên. Kơsô̆ unh hnam hin dơnuh kơ dêh char hlôi tơjur đơ̆ng 33,7% ah jê̆ đĭ sơnăm 2004 truh dang ei oei pă 5,2%. Dêh char tơlĕch tơchơ̆t ăn sơnăm 2024 tơjur 3% unh hnam hin dơnuh atŭm păng hơdrin truh đĭ sơnăm 2025 kăp gĭt pă đei oei unh hnam hin dơnuh kiơ tơchơ̆t ‘nao. Vă kĕ đei jơnei tơchơ̆t âu, atŭm hăm iŏk yua dôm tơchơ̆t jang đơ̆ng Teh đak, Đak Nông oei akŏm pơm kiơ̆ lơ trong jang kăp gĭt păng đei jơnei.