Ƀok Lê Trọng Yên, Phŏ Kơdră Anih jang vei lăng kon pơlei dêh char Đăk Nông ăn tơbăt, dêh char đei bô-xít lơ hloh păng lơ anih jang mŭk drăm hlôi pơtruh hla hô sơ asong pơm jang gah bô-xít hăm kơsô̆ jên chih măt lơ hloh. Vă pơjing tơdrong jang pran, dêh char Đăk Nông asong khul kơpal pơtruh nơ̆r hăm anih jang kơpal hloh vă tơlĕch ming man jăl trong gre treng tơring Tây Nguyên.

Lơ̆m noh, Đăk Nông pơtruh nơ̆r hơdrol hloh athei ming man jăl trong gre treng Đăk Nông - Chơn Thành (Bình Phước) vă pơtoi hăm trong gre treng Xuyên Á năm truh dơnŏk duk Thị Vải, 'măn chơ pơdŭ alumin, nhôm pơm jang. Atŭm hăm noh athei hơlen lăng trong gre treng Đăk Nông - Lâm Đồng - Bình Thuận pơkăp lơ̆m jăl trong gre treng kơ teh đak. Trong gre treng ou adoi tơgŭm chơ pơdŭ tơmam choh pơtăm nai, tơgop hơtŏk jang mŭk drăm – tơpôl tơ̆ tơring păng dôm dêh char lơ̆m tơring.