7-Kiơ̆ Anih vei lăng trong nơnăm dêh char Đắk Nông, ‘mi tih đak tơjroh ƀât hơtuch khei 7, ƀât blŭng khei 8 âu ki phă pơrăm 2 tŏ trong gĭt kăl lơ̆m dêh char, đei 300m Trong Hồ Chí Minh kơdâu klĕch phường Nghĩa Thành, plt Gia Nghĩa; 850m trong dêh char kơsô̆ 1 găh xăh Quảng Tâm, apŭng Tuy Đức. 2 tŏ trong âu đei anih tĕh hlŭn tơdrŭt tôch dêh. Anih vei lăng kon pơlei dêh char Đắk Nông roi tơbăt tơdrong krê hơmơt, pơtho ăn dôm anih jang kơpal kơ dêh char jăh hơmet ming, vă ăn gre kơdâu vih vât tơ̆ 2 tŏ trong âu dơ̆ng.

Mă lei, tơdrong hơmet ming dôm tŏ trong âu dang ei oei tơƀâp lơ tơdrong pơmat tat, mă loi jĭ tam mă chă đei jên vă hơmet ming. Kiơ̆ tơdrong jô̆ hơlen blŭng a, kăl đei dang 300 ti hlak jên vă hơmet ming pơ ‘lơ̆ng 2 tŏ trong âu. Lơ̆m nŏh, dêh char oei apinh trung ương tơgŭm 150 ti hlak jên đơ̆ng kơsô̆ jên vă tang găn sar bar tŏ ‘mi kial kơnê̆ vă pơm hơmet ming trong gre dêh char kơsô̆ 1. Hăm trong Hồ Chí Minh, dêh char oei apinh Anih tơm vei lăng trong nơnăm chih hơdăh kơsô̆ jên kŭm nhen trrong vă pơm hơmet ming.