Ƀok Trần Đình Hiệp, Kơdră Anih jang Mŭk drăm păng Cham char dêh char Đak Nông ăn tơbăt, tơdrong mă teh hơlih ah jih đak krong Krông Nô roi năr roi hli hlơt lơ̆m lơ sơnăm kơ âu, mă kăl noh đơ̆ng rŏng kơ đei ming man dôm hnam kơmăi unh hơyuh Buôn Tua Srah păng hnam kơmăi unh hơyuh Chư Pông Krông. Ƀok Hiệp adoi sơkơ̆t gah tơdrong hơlih tơ̆ đak krong Krông Nô đei noh kơyuơ đơ̆ng tơdrong chă kôch chuơh đơ̆ng dôm anih jang mŭk drăm kơ 2 dêh char Đăk Lăk păng Đak Nông asong hla bar pơm jang. Đak krong  Krông Nô roi năr roi hơlih să hloh. Kiơ̆ kơ ƀok Hiệp, kơyuơ ưh kơ băt sơnong jang hơdah kơ dôm anih jang mŭk drăm vă chă hơlen hrŭ 'mong ăn kon pơlei oei ƀơm lơ tơnap: “Kơyuơ đơ̆ng tơdrong kôch chuơh păng hnam kơmăi unh hơyuh – tơ-'ngla asong jang tơm noh Buôn Tua Srah ưh đei drơ̆ng nơ̆r gah hrŭ 'mong mă pơkăl dêh char athei tơkan vă dôm anih jang kôch chuơh kơ 2 pah atŭm vang hrŭ ăn kon pơlei. Dang ei tơnap noh, teh hơlih thoi âu mă lei sơkơ̆t tơdrong răm, tơdrong hrŭ 'mong đơ̆ng anih asong jang yơ adoi tơnap, hnam kơmăi unh hơyuh dôm yơ, anih jang kôch chuơh dôm yơ noh tam mă đei sơkơ̆t hơdah”

Kiơ̆ kơ ƀok Trần Văn Khánh, Kơdră Kŏng ti hnam kơmăi unh hơyuh Buôn Kuốp, tơdrong mă teh hơlih ah jih đak krong Krông Nô hlôi đei sơkơ̆t kơyuơ đơ̆ng lơ tơdrong nhen teh pui, hơyuh tŏ 'mi tơplih, kôch chuơh păng kơmăi kơdâu tơlĕch unh hơyuh. Lơ̆m noh, tơdrong tơm pơm jang đơ̆ng hnam kơmăi unh hơyuh đei sơnong jang đơ̆ng Kŏng ti unh hơyuh Buôn Kuốp. Mă lei, đơ̆ng sơnăm 2018 truh dang ei, teh hơlih ah jih đak krong Krông Nô hli hlơt pơrăm tih tên đơ̆ng tơdrong kôch chuơh. Gah hnam kơmăi unh hơyuh kơchăng hrŭ ‘mong ăn kon pơlei, mă lei pơkăl jơnŭm pơgơ̆r tơring athei sơkơ̆t hơdah sơnong jang kơ dôm anih jang mŭk drăm đei tơrĕk.

Adoi kiơ̆ kơ ƀok Khánh, tơ̆ minh ƀar jăl teh hơlih, Hnam kơmăi unh hơyuh Buôn Kuốp iŏk hrŭ ‘mong. Adrol ki, dôm hơgăt teh choh jang kơ kon pơlei ƀơm hơlih, jơnŭm pơgơ̆r tơring tơchơ̆t tơlĕch trong jang, kŏng ti đei trong asong jên hrŭ. Mă lei dôm sơnăm tơjê̆ âu, jơnŭm pơgơ̆r tơring pơkăl kŏng ti athei kơdih pơdrơ̆ng hăm kon pơlei lơ̆m tơdrong hrŭ ‘mong: “Dang ei đei lơ tơdrong, trong pơm jang nhen adrol ki noh jơnŭm pơgơ̆r tơring akhan, kơyuơ dôm tơchơ̆t gah luơ̆t, jơnŭm pơgơ̆r tơring ưh đei tơchơ̆t gah hrŭ ‘mong dơ̆ng ôh, mă pơkăl Hnam kơmăi unh hơyuh Buôn Kuốp pơma dơnuh pơdrơ̆ng hăm kon pơlei gah jên hrŭ ‘mong, tơgŭm hơgăt teh ƀơm hơlih. Tơchơ̆t hrŭ ‘mong, tơgŭm athei đei anih jang kơpal kơ teh đak kĭ tơchơ̆t noh kŏng ti pơtơm tơlĕch jên. Hla bar pơtruh ăn tơring đang kơ noh hŏk hôp hơnơ̆ng mă lei tam mă đei pơklaih ôh”

Ƀok Trần Đăng Ánh, Phŏ Kơdră Anih jang vei lăng kon pơlei apŭng Krông Nô, dêh char Đak Nông ăn tơbăt, tơdrong hrŭ ‘mong răm đơ̆ng teh hơlih ah joh đak krong Krông Nô lơ̆m khei năr âu ki kơyuơ 2 anih jang kôch chuơh păng hnam kơmăi unh hơyuh iŏk jang. Minh ƀar anih teh hơlih ‘nguaih kơ anih jang đei asong hla bar phep pơm jang ăn dôm anih jang kôch chuơh noh gah Hnam kơmăi unh hơyuh Buôn Kuốp pŭ sơnong hrŭ ‘mong.

Hơdrol ki, Anih jang vei lăng kon pơlei apŭng kĭ tơchơ̆t hrŭ ‘mong teh ƀơm hơlih. Mă lei ah hơlen lăng dơ̆ng Luơ̆t teh sơnăm 2013 noh ưh đei pơkăp jơnŭm pơgơ̆r apŭng thu iŏk teh, hrŭ ‘mong noh tơgŭm đĕch kơlih tơdrong pơm jang đơ̆ng hnam kơmăi unh hơyuh pơm đei. Kơyuơ noh, apŭng hlôi tơlĕch trong jang tơgŭm hnam kơmăi unh hơyuh pơm kiơ̆ tôm tơdrong tơchơ̆t hrŭ ‘mong nhen hơdrol ki, hơdrô̆ pha ah mă hơtuch noh kŏng ti athei tơchơ̆t hrŭ ‘mong. Mă thoi noh, gah Hnam kơmăi unh hơyuh Buôn Kuốp adoi tam mă drơ̆ng nơ̆r, pơm ăn tơhlăk tăk pơdui đunh: “Apŭng adoi pơm jang hăm Kŏng ti Buôn Kuốp lơ ‘măng bơih. Apŭng pơgơ̆r anih jang mŭk drăm cham char sơkơ̆t hơdah kiơ̆ trong hơlen chih akŏm vă tơroi truh kŏng ti. Kŏng ti kiơ̆ kơ noh vă kĭ mă lei kŏng ti pơkăl kĭ tơchơ̆t noh oei tơhlak ah anih âu. Dang ei pơklaih mă âu đĕch: kĭ tơchơ̆t trong jang tơ̆ apŭng dah mă anih tơm asong jang – anih iŏk jang hrŭ ‘mong kiơ̆ kĭ tơchơ̆t. Hơpơi ‘meh Kŏng ti Buôn Kuốp jang atŭm kơjăp hloh, mă kăl noh apinh đei anih jang kơpal tơgŭm đei trong sek tơlang mă tơnăp”

‘Nao âu, Kơdră Anih jang vei lăng kon pơlei dêh char Đak Nông hlôi pơgơ̆r Anih jang Mŭk drăm păng Cham char akŏm khul chă hơlen, jang atŭm hăm dêh char Đăk Lăk sơkơ̆t hơdah tơdrong tơm đei teh hơlih ah jih đak krong Krông Nô păng sơnong pŭ kơ dôm pah đei tơrĕk vă dah hrôih tơlĕch hrŭ ‘mong ăn kon pơlei. Atŭm hăm noh, rim anih jang đei tơrĕk kơ dêh char athei pơm kiơ̆ kơjăp pơkăp lơ̆m Tơchơ̆t 23 đơ̆ng Jơnŭm pơgơ̆r teh đak pơkăp gah vei lăng chuơh, rơga lơ̆m đak krong, păng ah jih đak krong.