Kiơ̆ Tơchơ̆t đơ̆ng Anih jang Choh pơtăm păng Hơtŏk tơring tơrang dêh char Đăk Nông găh hơmet dơ̆ng anih jang vei lăng bri lơ̆m Anih tơm jang Vei lăng bri apŭng Đăk Glong păng Anih jang vei lăng bri pơlei tơm Gia Nghĩa đei hơkŏm atŭm jing Anih jang vei lăng bri apŭng Đăk Glong - Gia Nghĩa. Anih jang vei lăng bri apŭng Tuy Đức păng Anih jang vei lăng bri apŭng Đăk R’lấp đei hơkŏm jing Anih jang vei lăng bri apŭng Tuy Đức - Đăk R’lấp. Anih jang vei lăng bri apŭng Đăk Song păng Anih jang vei lăng bri apŭng Đăk Mil đei hơkŏm jing Anih jang vei lăng bri apŭng Đăk Song - Đăk Mil. Anih jang Vei lăng bri apŭng Krông Nô păng Anih jang Vei lăng bri apŭng Cư Jút đei hơkŏm jing Anih jang Vei lăng bri apŭng Krông Nô - Cư Jút.

Kiơ̆ tơroi đơ̆ng Anih tơm jang vei lăng bri Đăk Nông, 8 anih jang vei lăng bri kơ 8 apŭng, pơlei tơm adrol âu ki đei 23 kăn ƀô̆ jang kơdră pơgơ̆r. Đơ̆ng rŏng kơ hơmet dơ̆ng noh gô tơjur 4 kơchư̆k jang kơdră vei lăng bri, 18 kăn ƀô̆ đei axong tơdrong jang nai, 1 kăn ƀô̆ noh pơdơh kơyuơ đĭ xơnăm jang kiơ̆ tơchơ̆t.