Blŭng pơyan ‘mi sơnăm ou, tơ̆ dêh char Dak Nông hlôi đei ‘măng ‘mi đunh năr pơm ăn đak lŏk jrŏh, đak lip, teh tơdrŭt hơlih tơ̆ tơring thŭng. Tơlĕch kơtang jang tang găn ‘mi kial pơrăm, Hơnih vei lăng kon pơlei dêh char Dak Nông hlôi pơrô̆ athei rim hơnih bơ̆ jang, tơring tơrang dăr lăng kơjăp, tơlĕch trong jang hơdăh, mă kăl dôm hơnih hơmơt kơtang đei đak lip, teh tơdrŭt hơlih... Hăm dôm tơdrong ưh kơ kăl ‘noh ưh kơ pơgơ̆r hop akŏm kơtă mălei lăp pơgơ̆r hop akŏm trư̆k tuyên hăm tơring, atŏk kơtang pơrô̆ athei kon pơlei kơchăng tang găn hơlou ‘mi kial pơrăm. Rim tơngla dơnou đak, hơnih jang vei lăng choh jang sa păng tơring dăr lăng kơjăp vă chă ming hơmet dôm dơnou ưh kơjăp ‘lơ̆ng hăm trong 4 kơtă, ‘nĕ lê̆ đei tơdrong răm ưh kơ ê.