Dơ̆ng kơpal mir đei lơ anih tĕh hơđang, yă Hà Thị Thốt, tơ̆ plei Quảng Tiến, xăh Quảng Sơn, apŭng Đak Glong, dêh char Dak Nông tôch pơngơ̆t mưh hlŏh 3ha tiu oei vă hơlih jur tơ̆ dơnâu Đak N’ting. Yă tơroi, yă choh jang tơ̆ âu đĭ lơ sơnăm bơih mă lei ưh đei tơdrong kiơ. 2 sơnăm ‘nâu, ƀât dơnâu Đak N’ting đei man găn ‘nŏh đei ƀôh tĕh hơđang vă hơlih păng sơnăm ‘nâu ‘nŏh dêh hlŏh.

Yă Thốt athei dôm khul kơdră pơgơ̆r tơring tơlĕch trong jang vă vei sơđơ̆ng tơdrong arih xa ăn kon pơlei lơ̆m tơring: “Hnam, tĕh nhôn tơ̆ âu ngăl, oei tôch kơ krê hơlih, hnam đĭ hơđăh bơih, hơmơt hiong hnam, hiong pơgar dêh. Dang ei hnam ưh pă đei vă oei xa. Hơpơi ‘mĕh Khul kơdră pơgơ̆r chă pơjing hnam oei, lăng năng tĕh pơgar thoi yơ, vă kon pơlei da ƀiơ̆ pơngơ̆t.”   

Ƀok Nguyễn Văn Nghĩa, Kơdră Anih vei lăng dôm tơdrong tơmât jên jang ming man kơ dêh char Dak Nông tơroi, Dơnâu Đak N’Ting kĕ mong dang 1,2 triu m3 đak, đei Anih vei lăng kon pơlei dêh char Dak Nông kĭ ăn man sơnăm 2018, akŏm đĭ đăng jên man vă jê̆ 137 ti. Hrei ‘nâu, dơnâu đĭ man đang bơih, tơ ‘ngla tơmât jên jang oei pơm pơkĕh dôm hla ar đei ƀơm truh vă hơlen năng păng pơjao iŏk yoa dơnâu. Mă lei, ‘mi tih đunh, ‘năr 1/8, dơnâu Đak N’ting đei ƀôh tĕh hlŭn, hơđăh tơ̆ bơnơ̆, vă hơlih tôch hơmơt. Hăm dôm unh hnam jŭm dăr dơnâu đak, hnam oei đei ƀôh hơđăh hơnă ‘năi. Vă vei lăng sơđơ̆ng, khul jang kơpal pôk rĭ 34 unh hnam. Găh Anih vei lăng hlôi tơlĕch trong hơmet pơ ‘lơ̆ng tĕh hlŭn hơlih, mă loi hăm tĕh tơter groi kông găh ‘ngieu păng găh ‘ma dơnâu đak. Mă lei, hrei ‘nâu, tơ̆ tơring oei hơnơ̆ng đei ‘mi, đak lơ̆m dơnâu roi tŏk kơna tơdrong hơnhăk kơmăy kơ mŏk năm bơ̆ jang, hơmet ming tôch kơ krê:        

“Lăp đei tơdrong sar bar ‘nŏh hlôi đei hloi trong jang phă lê̆ 1 păh bơnơ̆ đak blai vă tơjur đak lơ̆m dơnâu mă lei đơ̆ng rŏng kơ hơlen năng ‘nŏh ƀôh dang ei đak oei blai, tôch hơmơt pơjoă truh tơdrong arih kon bơngai, kơna tam mă pơ̆n phă. Oei trong jang ‘nŏh đĭ tơchĕng truh bơih, dang ei oei gô lăng đak jur tŏk ‘mơ̆i, mưh ƀôh sơđơ̆ng bơih ‘nŏh pơgơ̆r bơ̆ jang hloi.”        

Truh dăr lăng kơtă tơ̆ dơnâu Đak N’ting, Phŏ Kơdră vei lăng tơdrong choh jang xa păng atŏk tơiung tơring tơrang ƀok Nguyễn Hoàng Hiệp, Phŏ Kơdră Anih pơgơ̆r jang kơ tĕh đak găh tang găn sar bar, tŏ ‘mi kial kơnê̆ akhan, tơdrong tĕh hlŭn hơlih tơ̆ dơnâu đak âu tôch hơmơt. Hăm tơdrong ‘mi kial nhen hrei ‘nâu, tôch hơmơt đei hlŏh 1 triu m3 tĕh hơlih jur lơ̆m dơnâu, tôch hơmơt dơnâu pơchăh. Kiơ̆ đơ̆ng chă hơlen năng, Ƀok Phŏ Kơdră Nguyễn Hoàng Hiệp akhan, đĭ đei trong vă hơmet tơdrong ‘nâu tơ̆ dơnâu đak âu bơih. Mă lei, jơ năr ‘măn ăn tơ ‘ngla tơmât jên jang ưh kơ lơ, lăp păn 2,3 năr vă “dŏng” dơnâu đak âu, adrol kơ đei dơ̆ng 1 ‘măng ‘mi tih tơ̆ tơring ƀât hơtuch khei 8:  

“’Mĕh vei lăng dơnâu đak âu ‘nŏh athei đei trong jang ‘lơ̆ng păng bơ̆ jang mă hrĕnh. Mă 1 ‘nŏh hơmet tĕh hlŭn vă hơlih, mă 2 ‘nŏh găn ƀiơ̆ đak mong pơtơ̆ng lơ̆m dơnâu. Tơdra adrol lơ̆m 15 năr truh đei ‘mi mă lei ưh kơ đei tih, 15 năr truh ‘nŏh jang gơ̆h. Mă lei, hơtuch khei 8 ‘nŏh đei dơ̆ng 1 ‘măng ‘mi đơ̆ng 10-15 năr nhen ‘măng âu ki, ‘mi tôch tih ‘nŏh tôch kơ hơmơt. Tơdăh đei dơ̆ng 1 ‘măng ‘mi thoi brei drâu ‘nŏh ưh jor tĕh hlŭn âu gô hơlih jur tơ̆ hơla.”        

Kiơ̆ đơ̆ng hơlen năng ‘mi tơ̆ yăn âu kŭm nhen hơlen năng tơ̆ 1,2 anih tĕh hơlih păng dơnâu đak oei hơđăh vă hơlih tơ̆ Dak Nông, Phŏ Kơdră tơm vei lăng tơdrong choh jang xa păng atŏk tơiung tơring tơrang Nguyễn Hoàng Hiệp, Phŏ Kơdră Anih pơgơ̆r jang kơ tĕh đak găh tang găn sar bar akhan, tơdrong tơ̆ Dak Nông oei tôch krê hơmơt. Lơ anih hư răm đơ̆ng tŏ 'mi kial kơnê̆ nhen dơnâu đak, trong gre, kăl hŭt lê̆ 1,2 hơyak jang chă rơih anih jang plơ̆ng 'mơ̆i vă gơ̆h tơtom hơmet ming, tơmât yoa. Dêh char Dak Nông athei tơmât yoa trong jang hơmet pơ 'lơ̆ng atŭm hăm dôm tơdrong sar bar, dôm anih jang, trong nơnăm, dơnâu đak hư athei hơlen năng yoa kiơ, băt 'mơ̆i mă gơ̆h hơmet ming. Hăm dôm dơnâu đak oei hư, tĕh vă hơlih, tĕh hơđăh, dêh char Dak Nông athei tơchĕng truh tơdrong kơnê̆ hlŏh 'nŏh dơnâu pơchăh gô ƀơm ưh 'lơ̆ng truh tơ̆ tơring găh pơbăh thoi yơ. Kiơ̆ đơ̆ng nŏh, jăh tơlĕch trong vei lăng sơđơ̆ng ‘lơ̆ng tơmam drăm, tơdrong arih ăn kon pơlei, athei tơchĕng truh dơnâu đak pơchăh vă tơjră đơ̆ng dang ei hloi:

“Tơdrong kăl hlŏh mưh đei dôm tơdrong ‘nâu ‘nŏh jĭ vei lăng sơđơ̆ng ‘lơ̆ng tơdrong arih, tơmam drăm kon pơlei adrol. Inh athei dêh char tơchĕng hơlen dơ̆ng tơdrong krê mưh dơnâu pơchăh, mă bơ̆n ưh kơ đei ‘mĕh thoi nŏh ră păng inh hơmĕng gô ưh đei tơdrong ‘nâu. Tơdăh dơnâu pơchăh, 2 triu m3 đak tơjrŏh tơ̆ hơla thoi yơ, athei tơchĕng hơlen mă tôm trong đak ro tơjroh tơ̆ găh pơbăh. Lơ̆m nŏh athei đei trong trong jang, bơ̆n athei chông kon pơlei tŏk oei tơ̆ anih yơ, roi tơbăt ăn đe sư, tơroi ăn dôm unh hnam yơ athei chih mă hơdăh” ƀok Nguyễn Hoàng Hiệp pơma thoi nŏh.