Dêh char Kon Tum dang ei đei 5 anih jang bơ̆jang lơ̆m dôm Grŭp jang mŭk drăm, Kŏng ti tơm, Anih mong jên mơdro sa teh đak đei khŭl jang Đảng hăm 360 đảng viên ưh kơ găh đảng tơ̆ tơring. ‘Ngoăih kơ ‘noh, tơ̆ dêh char đei 9 anih jang găh dôm Grŭp jang, Kŏng ti tơm đei khŭl jang Đảng găh Đảng tơring hăm akŏp kơ sô̆ 536 đảng viên.

Pơtôch hơlen lăng ăn ƀôh, dôm kơdră đảng găh Anih jang Đảng Grŭp mơdro sa Trung ương hlôi chĕp kơ̆l pơgơ̆r dôm kơdră đảng tơring tơlĕch jang bơ̆jang kiơ̆ ‘lơ̆ng tơdrong jang hơdai hăm Anih jang Đảng dêh char Kon Tum. Jang hơdai đei yua lơ̆m tơdrong jang pơjing khŭl jang chĭnh trĭ - tơpôl, vang jang dôm tơdrong jang kơ tơring lăp hăm tơdrong jang đơ̆ng anih mơdro sa....

‘Măng âu, Anih jang Đảng Grŭp mơdro sa Trung ương pơjao 100 tŏ hnam ‘mêm mơnat asong ăn ŭnh hnam dơnuh hin tơ̆ 2 xăh mơmat tat dêh hloh ‘noh Mường Hoong păng Ngọc Linh kơ apŭng Đăk Glei, hăm akŏp kơjă 6 ti hlak jên.