Tŏk bŏk kơ ‘năr tŏ hlơ hlĕng kơ pơyan phang, dơ̆ng tŏk bŏk mir pơgar chehphe, Thiếu tá Nguyễn Phúc Thuận, Kơđông ƀô̆ đô̆i vei lăng sơlam teh đak dêh char Dak Nông hơngŭr chă pơtho ăn kon pơlei thôn Dak Thọ, tơring Dak Lao, apŭng Dak Mil kih thuơ̆t vei lăng năng tông ‘long pơtăm pơyan phang păng hơmet ăn chă jơmŭl pơtăm lơ̆m pơyan ‘mi.

Sơnăm au phang pơđang tôch kơtang, năm truh tơ̆ ŭnh hnam bu, ‘nhŏng jei hơnơ̆ng chă pơtho khan ăn kon pơlei pruih đak pơkom, iŏk yua đak păh ai vă đei đak truh hơtuch pơyan phang. Khei năr au, ‘long chehphe hlôi đei ƀôh pơrang pơrăm, mă kăl yă de, ‘nhŏng atŭm hăm kang ƀô̆ pơtrŭt choh jang sa chă pơtho ăn kon pơlei trong tang găn, pơtôch pơrang jơnei. Sơnăm au kơjă chehphe tŏk tôch kơmăt, lơ ŭnh hnam kon pơlei tŏk bŏk vă ‘meh pơtăm ‘nao. ‘Nhŏng jei hơnơ̆ng chă pơtho khan ăn kon pơlei chă rơih hơdrĕch mă hơlen, veh ver răt iŏk dôm hơdrech dơđăh đe chă tĕch mơdro ưh kơ ‘lơ̆ng. Đei Kơđông ƀô̆ đô̆i vei lăng sơlam teh đak Dak Lao ăn vang hop akŏm hăm chi ƀô̆ pơlei Dak Lao, Thiếu tá Nguyễn Phúc Thuận ling lang kơrŭn đĭ jơhngơ̆m vă vang tơgop pơm tơplih jơhngơ̆m đon tơchĕng trong jang sa, pơm hơtŏk tơdrong hơrih sa sơđơ̆ng.“Vă sơđơ̆ng ăn hơdrĕch dơđăh, kon tơrong trŏ lăp, ‘noh ba hlôi chă hơlen, iung jang hơdoi hăm khul kon pơlei choh jang sa tơring, apŭng chă tơchĕng hơlen dôm hơdrĕch ‘long pơtăm trŏ lăp vă chă pơtho ăn kon pơlei răt pơtăm. Ăn sinh viên chă pơma dơnuh hăm kon pơlei găh dôm trong jang sa trŏ lăp vă kon pơlei jang kiơ̆. Ba jei chă pơma apĭnh athei rim kang ƀô̆ năm truh tơ̆ pơlei vă vang chă tơgŭm djru ăn dôm ŭnh hnam tơnap tap”.

Ƀok Nguyễn Khắc Chinh, Bí thư Chi ƀô̆ thôn Dak Thọ, tơring Dak Lao, apŭng Dak Mil, dêh char Dak Nông tơbăt, đơ̆ng năr Thiếu tá Nguyễn Phúc Thuận đei pơjao vang hop akŏm hăm chi ƀô̆, hlôi tơgŭm ăn thôn tôch kơ lơ tơdrong hơ iă. Rim ‘măng hop akŏm chi ƀô̆ thôn trŏ lăp hloh dơ̆ng. Lơ tơdrong tơchơ̆t trŏ lăp hăm tơdrong hơrih sa, jang sa đei chi ƀô̆ tơlĕch ăn păng jang kiơ̆ jơnei. Rim đảng viên lơ̆m chi ƀô̆ jei băt hlôh ƀôh hơdăh hloh dơ̆ng găh hơnăp jang đơ̆ng kơdih. Lơ đảng viên hlôi kơrŭn đĭ jơhngơ̆m lơ̆m atŏk tơ iung choh jang sa vă kon pơlei kiơ̆ yok rok jơ̆ng. Lơ ŭnh hnam đơ̆ng mă noh hlôi pơ̆n tơplih ‘nao lơ̆m choh jang sa, rong kon tơrong, tơdrong hơrih sa roi năr roi đei ƀôh. Thôn oei đei lơ ŭnh hnam tơnap tap, Thiếu tá Thuận atŭm hăm chi ƀô̆ thôn dơ̆ng pang tang măt chă pơrô̆ hơvơn, chă tơra tơgop tơ iung pơjing ming man đei 4 pơbŭng hnam ‘mêm mơnat. Kiơ̆ đơ̆ng ƀok Nguyễn Khắc Chinh, ‘moi kiơ̆ dôm tơdrong jang đơ̆ng Thiếu tá Thuận, kon pơlei oei lơ̆m tơring sơlam teh đak roi lui kiơ̆ kơjăp hloh dơ̆ng hăm rim ƀô̆ đô̆i kơlong jơk.“Ƀok Thuận ‘noh jĭ kang ƀô̆ sơnăm mơlôh, tôch tơnăp, hơbĕch hơbal lơ̆m rim tơdrong jang. Chă pơtho khan ăn chi ƀô̆, adoi nhen kon pơlei lơ̆m thôn lơ̆m tơdrong choh jang sa, pơm kiơ̆ ‘lơ̆ng bơ̆ jang vei lăng sơđơ̆ng tơring sơlam teh đak. Kon pơlei tôch kơ ‘mêm kơ eng păng yom kiơ̆ kơtang”.

Hơngŭr "pêng tơklep, puăn hơdoi” vă “ ‘Mi pru ju nhoi”, tơgŭm kon pơlei oei lơ̆m tơring sơlam teh đak tơplih jơhngơ̆m đon tơchĕng, trong jang sa, pơm hơtŏk tơdrong hơrih sa sơđơ̆ng ‘noh jĭ hơnăp jang kơ dôm ƀô̆ đô̆i vei lăng sơlam teh đak đei ba ăn vang hop akŏm hơdoi hăm rim chi ƀô̆ thôn, pơlei lơ̆m tơring sơlam teh đak dêh char Dak Nông. Rim tơdrong jang, trong jang găh choh jang sa nhen chă pơrô̆ pơrôp, tơgŭm djru kon pơlei rong rơmo yŏng, pơtăm chehphe, sâu riêng, tiu rơgoh ‘lơ̆ng dăh mă rim trong jang lơ̆m hơrih sa tơpôl nhen kon mŏm ƀô̆ đô̆i vei lăng sơlam teh đak, chă pơrô̆ hơvơn kon pơlei hŭt hloi tơdrong ăn kon hơ ‘lơ̆p iŏk ŭnh om hrôih ...hlôi tơklep kơjăp hăm dôm tơdrong oei sa yan au kơ tơring. Yă H’Xuân, Kơ iĕng Ƀĭ thư Đảng apŭng Dak Mil, dêh char Dak Nông tơbăt, Ƀô̆ đô̆i vei lăng sơlam teh đak ăn kang ƀô̆ đảng viên pơm Kơ iĕng kơdră chĕp pơgơ̆r Đảng tơring, vang hop akŏm hơdoi hăm chi ƀô̆ rim pơlei pơla lơ̆m tơring sơlam teh đak kơ apŭng tôch trŏ lăp păng jơnei. “Hăm khul ƀô̆ đô̆i vei lăng sơlam teh đak lơ̆m apŭng ‘noh jei hlôi tơ iung pơjing đei lơ trong jang ‘lơ̆ng hơ iă đei tơlĕch jang kiơ̆ jơ̆p jang, kơtang. Dôm tơdrong jang au đei lang să kơtang păng kon pơlei lơ̆m apŭng hôn bơnê kơtang. Tơgop kơtang lơ̆m bơ̆ jang tơ iung pơjing pơlei pơla Dak Mil, mă kăl ‘noh jang kiơ̆ rim tơdrong tơchơ̆t đơ̆ng Đảng găh atŏk tơ iung mŭk drăm tơpôl păng tơ iung pơjing sơđơ̆ng dơ̆ng kơjăp lơ̆m tơring kơ apŭng.”

Đại tá Bùi Đức Chính, Kơ iĕng Kơdră chĕp pơgơ̆r Đảng Ƀô̆ đô̆i vei lăng sơlan Teh đak dêh char Dak Nông tơbăt, jang kiơ̆ nơ̆r pơrô̆ jang đơ̆ng Hơnih Đảng dêh char, Nơ̆r athei jang kiơ̆ đơ̆ng Khul kơdră chĕp pơgơ̆r Đảng Ƀô̆ đô̆i vei lăng sơlam teh đak, Ƀô̆ đô̆i vei lăng Sơlam teh đak Dak Nông hlôi đei tơbăt pơtruh ăn 57 đảng viên vang hop akŏm tơ̆ 55 chi ƀô̆ thôn, pơlei; 146 ‘nu đảng viên iŏk vei lăng năng tông 367 ŭnh hnam oei tơ̆ tơring sơlam teh đak. Rim đảng viên kơđông Ƀô̆ đô̆i vei lăng sơlam teh đak hlôi iung jang ‘lơ̆ng hơnăp jang pơchoh trong, tơgŭm djru ăn khul kơdră đảng tơring, chi ƀô̆ thôn pơlei vei kơjăp tơdrong pơgơ̆r hop akŏm ‘lơ̆ng hơ iă kơ chi ƀô̆.

Hăm dôm trong jang kon pơlei tơnăp, dôm trong jang hơ iă păng jơnei hlôi hlôi tơgŭm pơm hơtŏk tơdrong hơrih sa kơ kon pơlei, pơm hơtŏk kơtang tơdrong tơgoăt tơgoăl dih băl kơjăp kơ ƀô̆ đô̆i kon pơlei lơ̆m tơring sơlam teh đak. Tơjê̆ tơklep hăm kon pơlei, pơm hơtŏk jơhngơ̆m pran hloh dơ̆ng lơ̆m kon pơlei ‘noh trong kơnăl vă Ƀô̆ đô̆i vei lăng sơlam teh đak vei kơjăp iăp kơtang tơring sơlam teh đak păng roi năr roi atŏk tơ iung.